orta əsrlərəsəyahət
Açıq səma altında yerləşən bu heyrətamiz muzeydə özünüzü eyni anda həm tunc dövründə, həm də orta əsrlərdə hiss edə bilərsiniz. “Qala” Dövlət Tarix-Etnoqrafiya Qoruğunun yerləşdiyi Qala kəndi qədim yaşayış məskənidir. Bakıdan təxminən 40 km məsafədə yerləşən kompleksin ərazisi 81 hektardan çox, yəni 100-dən çox futbol meydançası böyüklüyündədir.
Burada qayaüstü rəsmlər, eramızdan əvvəl III-II minilliklərə aid tikililər, arxeoloji qazıntıların tapıntılarına tamaşa etmək və XIV əsrdə inşa edilmiş qalanın başına qalxıb Abşeron yarımadasına açılan möhtəşəm mənzərəni seyr etmək olar. Orta əsr şəhərində isə əcdadlarımızın həyat tərzi, onların geyimləri, istifadə etdikləri qab-qacaqlar, pullar və o dövrə aid naxışlarla tanış olmaq mümkündür. Bundan əlavə, interaktiv turdan istifadə etməklə xalça toxuya, gildən qab düzəldə, qədim sobada çörək bişirə və əsl dəmirçi emalatxanasında işləyə bilərsiniz.
Kompleksin digər qeyri-adi muzeyinin ekspozisiyası “Tullantıdan sənətə” adlanır. Burada məişət tullantıları – kabellər, lampalar, təkərlər, plastik su qabları, sellofanlar, oyuncaqlar, müxtəlif avtomobil hissələri və istifadəyə yararsız digər bir çox əşyadan hazırlanmış sənət əsərləri sizi keçmişdən müasir dövrümüzə qaytaracaq. Burada 180-ə yaxın müxtəlif sənət nümunəsi – yerli sənətkarlarla yanaşı, dünyanın müxtəlif ölkələrindən olan sənətkarların əsərləri də nümayiş etdirilir. Dəmir parçalarından düzəldilmiş Simurq quşu, taxta tullantılardan hazırlanmış at fiqurları, plastik qaşıq, çəngəl və bıçaqlardan balıq obrazı diqqəti cəlb edən eksponatlardan sadəcə bir neçəsidir.
“Qala” qoruğunda siz eksponatların bəzilərinə, həmçinin uşaqların çox sevəcəyi kiçik zooparkda quzu, keçi və dəvə balalarına da toxuna bilərsiniz. Turlar 3 yaşa qədər uşaqlar üçün ödənişsiz, 12 yaşa qədər uşaqlar üçün isə yarı qiymətədir. İstədiyiniz qədər şəkil çəkdirməyə isə heç kim mane olmayacaq.
.jpg)
