neft yatağındanturistlərin sevimlisinə
Neftin müasir tarixinin haradan başladığını heç düşünmüsünüzmü?
Neftin vətəni sayılan Azərbaycanın neft hekayəsi Bibiheybət qəsəbəsindən başlayır. Belə ki, dünyada ilk dəfə 1846-cı ildə Bibiheybətdə sənaye üsulu ilə neft quyusu qazılıb. 20-ci əsrin əvvəllərində Azərbaycanı aparıcı neft istehsalçısına çevirən bu hadisə, həmçinin neft sənayesində bir çox ilklərin başlanğıc nöqtəsi olub. Yenidən bərpa edilən neft quyusu bu gün Bakı Bulvarında böyük neft tariximizi təcəssüm etdirir.
Bir vaxtlar “qara qızıl” cənnəti olan Balaxanı qəsəbəsi də neft quyuları ilə məşhur olub. Hətta XIX əsrin ortalarında Balaxanı ərazisində 50-yə yaxın neft quyusu qazıldığı deyilir. Qədim tarixə malik olan qəsəbə indi yeni rənglərə boyanıb, küçələr daşlarla döşənib, divarlarda isə rəssamlar tərəfindən çəkilən maraqlı dekorasiyalar göz oxşayır. Balaxanıda keçmişin izlərinə XVII əsrə aid Şah Səfi karvansarasından (giriş sərbəstdir) tutmuş XIV əsrin Qum Hamamı və Ovdan su kəhrizində rast gəlmək mümkündür. Əlbəttə ki, Balaxanı gəzintisini EZOne turlarına (ezone.az) qoşulmadan tamamlamaq olmaz. Bələdçilər tərəfindən keçirilən tur zamanı bir çox maraqlı və tarixi yerləri - Rus hamamı, Ovdan, Qum hamamı, M.Ə.Sabir heykəli və digər yerləri gəzib-görmək imkanı yaranır.
Balaxanı və Bibiheybət qəsəbələri dedikdə, qədim neft mərkəzləri ağla gəlsə də, bu gün bu qəsəbələr müasir infrastrukturu ilə turistləri qarşılayan məkanlardandır. Yenidənqurma işlərindən sonra neft buruqlarının ağuşunda olan bu qəsəbələrdə yeni nəfəs, müasir toxunuşlar aydın hiss olunur. Hər biri sanki İtaliyanın sahilyanı qəsəbələrini xatırladır. Hətta bu yerlər indi turistlərin gəzinti və fotosessiyalar üçün sevimli istiqamətlərindən biridir.
.jpg)
