ilk tanker-muzeydəgəmiçiliyə səyahət
Dünyanın ilk tanker-muzeyinin yerləşdiyi “Suraxanı” gəmisi uzun illər Xəzərdə neft daşınmasında istifadə edilib. 2021-ci ildən muzey kimi qapılarını ziyarətçilərin üzünə açan gəmiyə ayaq basdığınız andan özünüzü tarix ilə müasir texnologiya arasındakı körpüdə hiss edəcəksiniz. Muzeyin zalları ilə gəzərkən dünyada gəmiçiliyin tarixi, ilklərə imza atan gəmilər, naviqasiya alətləri və cihazları, min illərdir istifadə olunan dəniz düyünləri, Bakının neft tarixi ilə bağlı maraqlı məlumatlarla tanış ola biləcəksiniz. Muzeydə gəzintiniz sadəcə seyr etməklə bitməyəcək: kəndirlərdən istifadə etməklə məşhur dəniz düyünlərini bağlamaq, Morze əlifbası ilə məlumat ötürmək, VR (virtual reallıq) eynəkləri ilə gəminin maşın şöbəsində çalışan heyətin iş həyatı ilə tanışlıq imkanınız da olacaq. Balaca ziyarətçilər isə müxtəlif dəniz oyunları, manipulyatorlar vasitəsilə gəmi sürmək, gəminin yanalma əməliyyatını yerinə yetirmək kimi fəaliyyətlərlə əylənə bilərlər. XVIII-XX əsrlərə aid gəmiçiliklə bağlı unikal eksponatlara toxunmaq, ölkəmizin və dünyanın ən böyük gəmilərinin modellərinə tamaşa etmək də marağınıza səbəb olacaq.
Muzeyin ən maraqlı hissələrindən biri də “Suraxanı” gəmi heyətinin istifadə etdiyi kayutlar, məişət otaqlarıdır. Burada hər şey ötən əsrin 60-cı illərinə aid orijinal görkəmindədir. On illər öncə tankerdə istifadə olunan məişət avadanlıqlarını, əşyaları görmək, gəminin idarə edilməsi üçün vacib postlardan olan kapitan körpüsündə olmaq, buradakı naviqasiya və radio otaqlarının orjinal görkəmini seyr etmək unudulmaz təəssüratlar yaşadacaq. Ekskursiyadan sonra isə restoranda dəniz məhsullarından hazırlanmış təamları nuş etməklə dənizçilik aləminə səyahətinizi davam etdirə bilərsiniz.
Ətraflı məlumat üçün:
“Suraxanı” gəmi-muzeyi
Ünvan: Dənizkənarı Milli Park
Tel.: +99450 274 3097
.jpg)
