RostropoviçlərinBakıda yadigarı
Mstislav Rostropoviçin ailəsi hələ o dünyaya gəlməmişdən iki il əvvəl Bakıya təşrif buyurmuşdu. Belə ki, dahi bəstəkarımız Üzeyir Hacıbəyli Dövlət Konservatoriyasında dərs deməsi üçün 1925-ci ildə görkəmli musiqiçi, istedadlı violonçel ifaçısı, professor Leopold Rostropoviçi Bakıya dəvət edir. Əvvəllər Bakıya konsert vermək üçün səfər edən Leopold Rostropoviç bu dəfə ailəsi ilə birlikdə Bakıya köçür və onun həyat yoldaşı pianoçu Sofya Fedotova da konservatoriyada fortepiano fakültəsində dərs deməyə başlayır. Onların keçmiş Kolodezni küçəsində (indiki Rostropoviçlər küçəsi) 1931-ci ilə kimi yaşadıqları və 1927-ci ildə Mstislav Rostropoviçin dünyaya göz açdığı, uşaqlığının keçdiyi ev hazırda muzey kimi fəaliyyət göstərir.
Muzeyin ekspozisiyası M.Rostropoviçin uşaqlıq, gənclik və yaradıcılıq illərini əks etdirən maraqlı materiallarla zəngindir. Ekspozisiya iki hissədən ibarətdir. Birinci hissədə Rostropoviçlər ailəsinin yaşadığı evin ab-havası, o dövrün mühiti əks olunmuşdur. Muzeydə nümayiş olunan eksponatlar arasında Leopold Rostropoviçin Üzeyir Hacıbəyliyə yazdığı məktublar, Rostropoviçlər ailəsinə məxsus əşyalar, 19-cu əsrin sonu və 20-ci əsrin əvvəllərinə aid xalça və mebel da yer almışdır. Ekspozisiyanın ikinci hissəsində M.Rostropoviçin həyat və yaradıcılığının mühüm anları, onun haqqında filmlər, maestronun ifası ilə yazılmış audio kasetlər vardır. M.Rostropoviçin 2005-ci ildə Dövlət Filarmoniyasında konsert zamanı geydiyi frak, onun dirijor çubuğu, konsertdən çəkilmiş videokadrlar, şəkillər və üzərində maestronun avtoqrafı olan konsert proqramı muzeyin ekspozisiyasında nümayiş olunur. Ev-muzeyinə həftənin bazar ertəsindən başqa bütün günlər saat 10:00-dan 18:00-dək baş çəkə bilərsiniz. Biletləri muzeyin girişində əldə etmək olar.
Ətraflı məlumat üçün:
Leopold və Mstislav Rostropoviçlərin ev-muzeyi
Ünvan: Bakı ş., Rostropoviçlər küç. 31
Tel.: +99412 492 0265
museum.az/az/museum/33
.jpg)
