Bakı Atıcılıq Mərkəzindəadrenalin hissini yaşayın
Atıcılıq başqa idman növlərinə, digər hobbilərə bənzəmir. Hədəfi ilk dəfə gözündən nişan aldığınız an unudulmaz atıcılıq təcrübəsi, bol əyləncə və adrenalin vəd edir. Avropada ən böyük atıcılıq komplekslərindən biri olan Bakı Atıcılıq Mərkəzində atıcılıq bacarığınızı sınaya, sərrast atıcılığı öyrənə və maraqlı gün keçirə bilərsiniz. İnteryer dizaynı ilə gözoxşayan mərkəzdə həm açıq havada, həm də qapalı poliqonda idmanın güllə və stend atıcılığı növləri üzrə yarışlar və məşqlər keçirilir. Burada qonaqlara güllə atıcılığı ilə bərabər tir atıcılığı xidmətləri təklif edilir. Güllə atıcılığı sahəsində 10, 25, 50 və 300 metr məsafə üzrə atış tirlərindən istifadə etmək mümkündür. Tirlərdə yarışan qonaqların sayı məhz bu məsafələr üzərindən təyin edilir. Stend atıcılığı sahəsində 5 atış meydançası inşa edilib və atış hərəkətləri üçün 75 hədəftullayıcı avadanlıq quraşdırılıb.
Məşqlərə başlamazdan öncə qonaqlara təlimatçılar tərəfindən xüsusi təlim keçirilir və təhlükəsizlik qaydaları izah olunur və bundan sonra qonaqlar öz məharətlərini sərgiləmək üçün tam hazır olurlar. Təlim və atıcılıq müddətində hər bir qonaq fərdi bələdçi ilə müşahidə olunur. Eyni zamanda mərkəzdə 13 yaşdan yuxarı atıcılığa maraq göstərən gənclər üçün atıcılığı öyrənmək və yarışlarda təmsil olunmaq kimi geniş imkanlar yaradılıb. Bura, həmçinin yüksək səviyyədə komanda quruculuğunun keçirilməsi üçün də əlverişlidir. Mübarizə dolu komanda yarışları arbitrların nəzarəti altında keçirilir və yarımfinal və final mərhələlərinin nəticələri də onlar tərəfindən hesablanır.
Mərkəzin dörd mərtəbə və terrasdan ibarət mehmanxana binası idmançılar və məşqçilər, həmçinin qonaqların gecələməsi və istirahəti üçün istifadəyə verilib. Binada müxtəlif funksional sahələr - kafe, VIP gözləmə və istirahət, tədris, dopinq yoxlama, silah saxlama, konfrans və mətbuat zalları, tibb məntəqəsi və fitnes zalı fəaliyyət göstərir.
Həm fərdi, həm də qrup turlarına qoşularaq Atıcılıq Mərkəzinin qonağı ola bilərsiniz. Qrup turları üçün öncədən rezervasiya tövsiyə olunandır.
Ətraflı məlumat üçün:
Ünvan: Binəqədi rayonu, Sumqayıt şosesi 3D
Tel.: +99412 565 5617; +99412 565 5620; +99470 265 5620
Rezervasiya: +99455 207 01 90
Instagram: https://instagram.com/baku.shooting.center
.jpg)
