Bu qışınəsas tədbirləri
Azərbaycana qış səfəriniz Bakının Fəvvarələr meydanındakı bayram yarmarkasından dünyanın ən yaxşı xizəkçilərinin yarışacağı Şahdağ yamaclarınadək uzana bilər. Səfərinizi planlaşdırmaq üçün bu tarixləri qeyd edin!
Bakıda bayram ab-havası 27 noyabr 2026-cı il tarixində «Soyuq Əllər, İsti Ürək» xeyriyyə yarmarkasının açılışı ilə başlayır. 5 yanvar 2027-ci ilədək davam edəcək yarmarkada Fəvvarələr meydanı rəngarəng Yeni il bəzəklərinə bürünəcək, köşklərdə isə bayram şirniyyatları və digər təamlar satılacaq. Yarmarka şəhərin mərkəzində axşam gəzintisi üçün xoş bir dayanacaqdır.
31 dekabr 2026-cı il və 1 yanvar 2027-ci il tarixlərində Heydər Əliyev Sarayında Çaykovskinin «Şelkunçik» baleti nümayiş olunacaq. İmperator Rus Baleti Bakı Xoreoqrafiya Akademiyasının tələbələri ilə birlikdə canlı orkestrin müşayiəti ilə çıxış edəcək. Tamaşa 31 dekabrda gündüz, 1 yanvarda isə axşam göstəriləcək.
Şahdağ Turizm Mərkəzində yarış mövsümü 23–24 yanvar 2027-ci il tarixlərində Dağ xizəyi üzrə ölkə çempionatı ilə başlayacaq. Slalom yarışında qadın və kişi xizəkçilər bir-birinə yaxın yerləşdirilmiş qapılardan mümkün qədər sürətlə keçərək ən yaxşı nəticə uğrunda mübarizə aparacaqlar.
23 yanvar 2027-ci il tarixində yarışdan sonra musiqi Şahdağın əsas meydanında davam edəcək. boolood-un təqdimatında Avangart Tabldot DJ üçlüyü saat 16:00-da çıxış edəcək. Yaşı 18 və daha yuxarı olan qonaqlar xizək sürdükdən və ya slalom yarışını izlədikdən sonra günü dağlarda apre-ski musiqi proqramı ilə tamamlaya bilərlər.
6–7 fevral 2027-ci il tarixlərində Dağ xizəyi üzrə FIS Avropa Kuboku çərçivəsində Şahdağda qadınlar arasında iki slalom yarışı keçiriləcək. Xizəkçilərin döngələrdə sürəti necə qoruduğunu izləyin. Burada saniyənin bir hissəsi belə podiumdakı yerləri müəyyən edə bilər.
19–21 fevral 2027-ci il tarixlərində Şahdağ Qarüstü polo üzrə Dünya Kubokuna ev sahibliyi edəcək. Üçgünlük turnirdə Azərbaycanın «Land of Fire» komandası ilə yanaşı, İsveçrə, Avstriya və ABŞ-dan polo klubları iştirak edəcək.
24 fevral 2027-ci il tarixində Şahdağda Moqul üzrə Asiya Kuboku keçiriləcək. Xizəkçilər qar təpəcikləri ilə örtülmüş trasda çevik dönüşlər edəcək və tramplinlərdən sıçrayacaqlar. 25 fevralda isə Paralel moqul üzrə Asiya Kubokunun finalında xizəkçilər iki paralel trasda yan-yana yarışacaqlar.
5–7 mart 2027-ci il tarixlərində Şahdağ Xizək akrobatikası və moqul üzrə FIS Dünya Kubokunun finallarına ev sahibliyi edəcək. Proqrama moqul, paralel moqul və xizək akrobatikası daxildir. Tamaşaçılar paralel moqulda üz-üzə mübarizəni, xizək akrobatikasında isə idmançıların qar tramplinindən sıçrayaraq havada salto və fırlanmalar etdiyini izləyə biləcəklər. Mövsümün son «Büllur qlobus» mükafatlarının sahibləri də burada müəyyənləşəcək.
11–18 mart 2027-ci il tarixlərində Şahdağda Xizək alpinizmi üzrə ISMF Dünya Çempionatı keçiriləcək. Bu idman növündə dağa qalxmaq yarışın əsas hissəsidir. 17 martda keçiriləcək fərdi yarışın marşrutuna həm yoxuşlar, həm də enişlər daxildir. 18 martdakı şaquli yarışda isə qalib yalnız yoxuşdan ibarət marşrutu ən qısa vaxtda qət edən idmançı olacaq.
Yeni ili Bakıda qarşılamaq və ya mövsümün son yarışlarını Şahdağda izləmək üçün sizi maraqlandıran tarixləri Azərbaycan üzrə səfər planınıza daxil edin.
