Naftalan möcüzəsini kəşf edin
Azərbaycanın sağlamlıq turizminin mərkəzi hesab olunan Naftalan şəhəri şəfa axtarışında olan minlərlə insanın marağını cəlb edən unikal Naftalan neftinin vətənidir. Buradan çıxarılan neft görünüşcə adi sənaye nefti ilə oxşar olsa da, 70-dən çox xəstəliyi müalicə etməyə imkan verən unikal kimyəvi tərkibə və şəfalı xüsusiyyətlərə malikdir. Naftalana səfər edən turistlərin əsas məqsədi müalicəvi neft vannası qəbul etmək olsa da, bu müasir şəhər həm də qədim tarixi, yamyaşıl parkları və bütün ailənin istirahət və əyləncəsini təmin edən kurortları ilə tanınır.
Müalicəvi xüsusiyyətlərinə görə məşhurluğu əsrlərdir ki, uzaq yerlərə gedib çatan Naftalan neftinin həm də maraqlı tarixçəsi var. Rəvayətə görə, Naftalan neftinin müalicəvi olması xəstə bir dəvənin bu yerlərdəki yağlı göllər sayəsində sağalması ilə üzə çıxmışdır. Yazılı mənbələrdə isə bu neftin faydalı xüsusiyyətləri barədə məlumata Nizami Gəncəvinin əsərlərində, məşhur səyyah Marko Polonun səyahət qeydlərində rast gəlinir. Yağın sənaye üsulu ilə hazırlanmağa başlanması isə alman mühəndis və kimyagər Yegerin bu ərazilərə neft çıxarmaq arzusu ilə gəlməsi, insanların bu neft ilə yuyunmaq üçün gəldiklərini görüb dərman mazı istehsal etməyə başlaması ilə bağlıdır.
Naftalan Turizm İnformasiya Mərkəzinə baş çəkib Neft muzeyi pavilyonunda Naftalan neftinin tarixi ilə bağlı maraqlı məlumatları əks etdirən guşə ilə tanış ola bilərsiniz. Bundan əlavə burada Naftalan neftindən hazırlanmış kosmetoloji məhsulları, suvenirləri əldə edə, neft ilə çəkilmiş müxtəlif rəsm əsərlərini seyr edə bilərsiniz. Mərkəzdə Naftalan şəhəri və ətraf rayonların turizm məkanları barədə məlumatlar ala, turizm məhsullarını əks etdirən materiallar və xəritələri əldə edə bilərsiniz.
Naftalan Turizm İnformasiya Mərkəzi
Ünvan: Naftalan şəh., Qələbə parkı
Tel.: +99450 319 9455
