Təbiətlə baş-başa olmaq, şəhərin səs-küyündən uzaqlaşmaq, səssizliyin əhatəsində ağaclardan gələn zərif mehin həzin səsini duya bilmək, gecə göydə sayrışan ulduzları saya bilmək haykinqin yaratdığı xoşbəxtliyin sadəcə kiçik bir hissəsidir. Biz haykinq etdiyimiz zaman həm də təbiətə fayda veririk, belə ki, avtomobildən minumum istifadə etdiyimiz zaman hava və səs-küy çirkliliyi də azalır. Azərbaycanın şimal və şimal-qərb hissəsində istifadəyə verilən və uzaq dağ kəndlərindən keçən 16 yeni haykinq marşrutu bu macəranı dağ yürüşünü iştirakçıları üçün daha maraqlı və cəlbedici edir.
Yeni marşrutlardan biri Xınalıq-Qalaxudat üzrə dağ yürüşü Azərbaycanın ən yüksək yaşayış məntəqələrindən biri olan Xınalıq kəndində əsrarəngiz Qafqaz dağları qoynunda unudulmaz sərgüzəştlər yaşamaq üçün əla seçimdir. Xınalıqlılar yalnız bu xalqa xas dildə danışır və yerli sakinlər arasında məşhur sənətkarlıq növlərindən biri olan rəngli, yun materialdan corabların toxunması geniş yayılmışdır. Bu kəndlərdə qonaqlara yemək və gecələmə təklif edən qonaq evləri fəaliyyət göstərir. Yaxınlıqdan keçən Kuzun-Yerği kek cığırı ilə irəliləsəniz, Şahdağ platosunun sıldırım qayalıqlarının fonunda geniş subalp çəmənliklərindən zövq alıb ləzgi mədəniyyəti ilə tanış ola bilərsiniz. Lakin istiqaməti Kiçik Qafqaz dağlarına doğru çevirmək istəsəniz, əzəmətli Kəpəz və Qoşqar dağlarına açılan valehedici mənzərələr sizi qarşılayacaq. Azərbaycanın cənub mirvarisi hesab olunan Talış dağları Azərbaycanın bir çox əsararəngiz kəndlərini özündə birləşdirərək cənub regionunu haykinq üçün ən çox üz tutulan istiqamətlərdən birinə çevirir.
ATB və tərəfdaşları bütün bu yerlərdə ölkəyə gələn qonaqların müxtəlif turizm məkanlarını ziyarət etməsi və öz növbəsində yerli icmaların turizm sənayesindən gəlir əldə etmələri üçün turizm zonalarının mühafizəsi istiqamətində davamlı olaraq çalışır. Məhz bu dayanıqlılıq prinsipləri əsasında turistlərin ziyarət etdikləri məkanlar gələcək nəsillər üçün öz görkəmini və xüsusiyyətlərini qoruyub saxlaya biləcək.
.jpg)
