Astaradabulvar gəzintisi
2015-ci ildə fəaliyyət göstərən Astara bulvarı kiminin təmiz hava aldığı, kiminin istirahət etdiyi, kiminin də əyləncəli zaman keçirdiyi sevimli məkandır. Böyükdən-kiçiyə hamının ixtiyarında olan kompleks Xəzər dənizinin sahili boyunca 1 kilometr uzunluğunda olan ərazini əhatə edir. Bulvarın sahəsi 6 hektar, çimərliyin sahəsi 2 hektardır. 2018-ci ildə ərazisi genişləndirildikdən sonra yeni mənzərəsi daha da möhtəşəm olmuşdur. Park-bulvarda fəvvarə kompleksi, süni şəlalələr də bir başqa gözoxşayandır. Həmçinin ərazidə müxtəlif fəaliyyətlər axtarışında olanlar üçün əyləncə attraksionları quraşdırılıb. Çimərlik zonası tam təhlükəsiz və müasir standartlara cavab verir, eləcə də açıq voleybol meydançası və futbol meydançaları isə parkda idman həvəskarlarının ən çox vaxt keçirdiyi yerdir. Bir qədər adrenalin yaşamaq istəyənlər də kartinq və atçılığı təcrübə edə bilər. Əgər könlünüzə cənub bölgəsinə xas təamlarından və ya pürrəngi Astara çayı düşərsə, o zaman bulvarın kafe və çay evlərində dadlı bir fasilə verə bilərsiniz.
İnsan ruhunu sakitləşdirən sahil mənzərələri, müasir səviyyəyə çatdırılan şəraiti ilə Astara bulvarının sorağı artıq hər yana, hətta xarici ölkələrə də yayılıb. Xüsusilə yay mövsümündə axşamlar milli və xarici musiqilərdən ibarət ifalar astaralıların və gələn qonaqların zövqüncə olur.
