Astaranın mirvarisiSım kəndinə səyahət
Talış dağlarının əsrarəngiz təbiətə malik olması heç kim üçün sirr deyil. Astaranın Sım kəndi də Talış dağlarının qoynunda yerləşir. Qədim İpək Yolu üzrərində yerləşən və meqalit sal daşlarla əhatə olunan kəndin adı talış dilində “qayalıqda yerləşən kənd” mənasındadır.
Bu kəndin toxunulmamış təbiəti boyunca minilliklərlə yaşı olan ağaclar, qayalıqlar və tarixi tikililərinin qalıqları arasından keçərək özünüzü yeni yerlər kəşf edən səyyah kimi hiss edəcəksiniz. Qonaqpərvər yerli insanların üzündəki təbəssüm qəlbinizdə xoş izlər buraxacaq. Kəndin əhalisi daha çox arıçılıq, tərəvəzçilik, maldarlıqla məşğul olur.
Sım kəndinin özünəməxsus və çox fərqli atmosferi var. Bu da kənddə evlərin arasında və ətrafında yerləşən iri qoca ağaclar və hündür, mamırlı qayalarla əlaqədardır. Buranın nağıllardakı kimi qəribə sehirli havası var. Kəndin sonuna qədər getsəniz, təəccüblənməyə hazır olun. Burada sizi Sım şəlaləsi gözləyir. Şəlalənin ətrafında piknik edə və ya samovar çayına qonaq ola bilərsiniz. Şəlaləyə getmək üçün isə yerli əhalinin təşkil etdiyi UAZ və Niva markalı avtomobillər yardımçınız olacaq. Keçilməz və dar yollar, cığırlar sizə əsl macəra hissini yaşadacaq. Kəndin mərkəzində olan bu şəlalədən əlavə yaxın ərazilərdə daha iki şəlalə vardır.
Bundan əlavə, Sım kəndi yolu üzərində yerləşən su anbarında (Ojakəran kəndi) mükəmməl gözəlliyə malik mənzərənin seyrinə çıxa bilərsiniz. Sım kəndinə gedən yolun üzərində yerləşən qədim Ağ Körpü maraqlı məkanlardan biridir. Burada çayın ortasında əyləşərək yerli Astara çayının dadına baxmaq və təbiətdən həzz almaq olar.
Yolboyu naringi bağları sizdə xoş təəssürat yaradacaq və mövsüm zamanı səfər etsəniz, buradakı bağlarda yetişən orqanik meyvələrdən də ala bilərsiniz. Bundan əlavə, maşını saxlayaraq dağın başından Xəzər dənizinə açılan nəfəskəsici mənzərəni izləmək də burada “mütləq edilməli”lər siyahısındadır.
Ətraflı məlumat üçün:
Lənkəran Regional Turizm İdarəsi
lankaran@tourism.gov.az
+99425 254 03 77
+99450 531 69 96
