MƏSAFƏ: 2.3 KM
YOXUŞ: 167 M
ENİŞ: 10 M
|
MAKS. HÜNDÜRLÜK: 2254 M
MİN. HÜNDÜRLÜK: 2096 M
MÜDDƏT: 50 DƏQ
|
Ümumi uzunluğu 2.3 km olan bu marşrut haykinqsevərlər üçün həm mənzərə baxımından zəngin, həm də rahatlıq baxımından əlverişli piyada yürüş istiqamətidir. Aşağı Batabat gölü yaxınlığında quraşdırılmış məlumat lövhəsinin solundan başlayan yol gölün sağ sahili boyunca uzanır. Təxminən 300 m sonra sağa dönərək kiçik təpəlik ərazidən keçdikdə, 1 km məsafə qət edərək Yuxarı Batabat gölünə çatmaq mümkündür. Buradan marşrut gölün sol sahili ilə 800 m boyunca davam edir və dik qayalıqlarla əhatələnmiş möhtəşəm mənzərəyə aparır. Daha sonra yuxarı cığırı izləyərək 800 m irəlilədikdə, marşrut asfaltlı yol ilə kəsişir və Aşağı Batabat gölü – Zorbulaq marşrutu burada başa çatır.
Marşrut burada sona çatsa da, nişanları izləməklə Zorbulaq – Biçənək istiqaməti ilə sayəhəti davam etdirmək mümkündür. Sözügedən marşrutun ümumi uzunluğu 6.9 km təşkil edir. İlk 4.2 km məsafə nisbətən düz landşaft boyunca uzanır, daha sonra cığır asfalt yol ilə kəsişərək sıx meşəlik əraziyə keçir. Buradan əlavə 2.7 km uzunluğunda yol qət edərək Biçənək kəndinə çatmaq olar. Marşrut kənddən təxminən 200 m məsafədə başa çatır.
Bu marşrutu əks istiqamətdə də gedə bilərsiniz.
Ətraf cığırlar
Bu marşrut Biçənək – Zorbulaq marşrutu ilə birləşdirilə bilər.
Mövsüm
Ərazidə haykinq üçün ən uyğun dövrlər yaz, yay və payız mövsümləridir.
Qida və gecələmə
Marşrut boyunca mağazalar yoxdur, lakin marşruta çatmamış sonuncu dayanacaq olan Biçənək kəndində 2 mağaza fəaliyyət göstərir. Burada kirayə verilən kənd evlərində və ya Batabat İstirahət Mərkəzinin kotteclərində gecələmək mümkündür. Gecələməyi düşünürsünüzsə, çadır və digər ləvazimatları özünüzlə gətirməyiniz məsləhətdir.
Su
Marşrutun sonunda bulaq var.
Nəqliyyat
Naxçıvan şəhərindən Batabata taksi və ya şəxsi avtomobil ilə çatmaq mümkündür. Marşrutun başlanğıc nöqtəsinə qədər yol asfaltlıdır və bütün növ avtomobillər üçün uyğundur.
Vacib xəbərdarlıq
Marşrutun asfalt avtomobil yolu ilə kəsişdiyi nöqtədə nəqliyyat vasitələrini diqqətlə idarə edin. Göl buz bağladığı dövrlərdə buz qatının çox nazik olması səbəbindən üzərinə çıxmaq qətiyyən tövsiyə edilmir – bu, ciddi xəsarətlərə və təhlükəli vəziyyətlərə yol aça bilər.