vəhşi təbiətdəhəyəcanı hiss et
Cənubi Qafqazda ən böyük əraziyə malik olan bu park 2006-cı ildə yaradılaraq ölkənin ən əhəmiyyətli dağ və meşə landşaftını özündə birləşdirir. Həmçinin nadir və nəsli kəsilməkdə olan bitki və heyvan növlərinin qorunub saxlanılmasına xidmət edir. Göz işlədikcə uzanan geniş ərazidə aram-aram gəzişəndə ediləcəklər siyahınıza bir yenisini əlavə etmək istəyəcəksiniz. Ekoturizm sevənlər buradakı haykinq cığırları vasitəsilə dağları və Laza kimi etnik kəndləri kəşfinə çıxa bilər. Dinclik axtaranlar isə iberiya və şərq palıdı, püstə, Qafqaz vələsi və bir çox rast gəlinən bitki növləri arasında vaxt keçirə bilər.
Parkın biomüxtəlifliyi elə zəngindir ki, qarşılacaqlarınız tək bunlarla bitmir. Qonur ayı, çöl donuzu, nəcib maral, çaqqal və meşə pişiyi və çoxlu quş növləri parkın faunasının sadəcə heyrətamiz olduğunu göstərir. Hətta adı “Qırmızı Kitab”a düşən vaşaq, kerkenez və imperator qartalını da burada görəcəksiniz. Şahdağ Milli Parkına səfər sıradan bir gəzintidən daha çox həm də təbiətin yaradılış mahiyyətini dərindən duymaq üçün bir fürsətdir.
