həndəsi naxışları iləGülüstan türbəsi
Culfa rayonunun Gülüstan kəndi yaxınlığında yerləşən bu türbə orijinallığı, tikinti texnikası, gövdəsindəki naxış bəzəyi ilə diqqəti cəlb edir. Gülüstan türbəsinin tikilmə tarixi məlum olmasa da, memarlıq xüsusiyyətlərinə görə onun XII əsrdə inşa olunduğu ehtimal edilir. Bəzən “Kəsik günbəz” kimi xatırlanan, ornamentlərinin müxtəlifliyinə, naxışlarının rəmzi məna daşımasına, memarlıq quruluşuna görə Naxçıvanın, bütövlükdə türbə tipli digər memarlıq abidələrindən fərqlənən Gülüstan türbəsi orta əsr Azərbaycan memarlıq abidələri içərisində özünəməxsus yer tutur.
Türbə iki hissədən – sərdabə və türbədən ibarətdir. Üzərində yaradılan tağçaların içərisi incə naxış və ornamentlərlə doldurulmuşdur. Bu naxışlar elə yerləşdirilmişdir ki, müxtəlif formalı ornamentlər kimi görünür, ancaq yaxından baxarkən təkrar olunduğu hiss edilir. Türbənin memarlıq üslubu Səlcuqilər dövrünün abidələri ilə, üzərindəki həndəsi ornamentlər isə Əcəmi memarlıq məktəbinə daxil olan dünya əhəmiyyətli digər abidələr ilə oxşarlıq təşkil edir.
