Naxçıvanıntarixi hamamları
Əsrlər boyunca Şərqdə olduğu kimi, Naxçıvanda da hamamlar yuyunma, paklanma yeri olmaqla bərabər, həm də insanların sevimli görüş və ünsiyyət məkanına çevrilmişdir. Şəhərin mərkəzində 2015-ci ildə istifadəyə verilən Şərq hamamında bu ənənələr bu gün də davam etdirilir. Qadınlar və kişilər üçün nəzərdə tutulan iki ayrı bölmədən ibarət hamamda həm ənənəvi Şərq hamamının rahatlaşdırıcı təsirindən zövq ala, həm də sonda gözəl çaya qonaq ola bilərsiniz.
XIV-XV əsrlərə aid olan Nüsnüs hamamı Ordubad rayonunun Nüsnüs kəndində yerləşən tarixi memarlıq abidəsidir. Yeraltı hamamlar qrupuna daxil olan bu abidə soyunma və yuyunma zalı, ona birləşdirilən köməkçi otaqlar iki günbəzlə örtülüdür. Nüsnüs hamamını digər orta əsr hamamlarından fərqləndirən cəhəti isə onun divarlarının və günbəzinin dağ daşı ilə inşa olunmasıdır.
Şərq memarlığının digər gözəl nümunələrindən olan Yengicə hamamı əslən Şahtaxtı kəndindən olan xeyriyyəçi Tovuz xanımın sifarişi ilə XVIII əsrdə inşa olunmuşdur. Abidə XX əsrin 80-ci illərinə qədər hamam kimi fəaliyyət göstərmiş, 2018-ci ildə isə yenidən bərpa edilmişdir.
Şahtaxtı kəndindəki Şərq hamamı da bir çox yeraltı hamamlardan fərqli olaraq yarımyeraltı hamam sayılır. Həmçinin kənd sakinlərinin dediyinə görə, keçmişdə hamamı isitmək üçün samandan istifadə edilirmiş. Yenidən bərpa olunmuş hamama baş çəkməklə Şərq hamamlarının ənənələri ilə tanış olacaqsınız.
