təbiətə vurğunKükü kəndi
Naxçıvan şəhərindən təxminən 50 km məsafədə olan Kükü kəndi Naxçıvançayın ən böyük qollarından biri olan Kükü çayının yatağında yerləşir. Bu kənd haqqında danışarkən bir çoxlarının nəzərində gursulu bumbuz bulaqlar, yaşıl çəmənlər, bir də dadlı alma sortlarının yetişdiyi bağlar canlanır.
Kükü kəndi ərazisində olan Kükü dağı, Qanlıgöl və Keçəldağ, eləcə də Gurbulaq gəzməkdən doymayacağınız məkanlar sırasındadır. Ekoturizm və haykinq ilə məşğul olanlar Gurbulaq və Qanlıgöl istiqamətlərində turlara çıxa bilər. Burada unikal biomüxtəliflik və landşaft üzrə fotoovçuluq üçün əlverişli imkanlar da var. Gurbulaq və ətrafındakı ecazkar mənzərələri sözlə izah etmək mümkün deyil. Bu yerlər xüsusilə yay aylarında üç fəsli bir arada yaşamaq zövqü verir.
Kənddən 7 km məsafədə yerləşən Qanlıgöl və ətrafı isə Naxçıvanın qədim yurd yerlərindəndir. Buraya üz tutan turistlər yaylağa köçmüş çobanların həyat tərzi ilə tanış olur, onların mətbəxindən, xüsusən təndir kababı və ocaqda qaynadılmış limonlu kəklikotu çayından dadıb çadırlarda dincəlirlər.
