Naxçıvanınmənəvi irsi
Muxtar respublika ərazisində dünyanın dörd bir yanından zəvvarların ziyarət etdiyi çoxsaylı dini məkanlar var. Regionun mənəvi və mədəni sərvəti sayılan bu məkanlara baş çəkərək onların çoxşaxəliliyinə şahid olmaq mümkündür.
İlkin olaraq məşhur rəssam Bəhruz Kəngərlinin naturadan çəkdiyi rəsmdə təsvir olunan birminarəli Came məscidini ziyarət etməyi tövsiyə edirik. Naxçıvan şəhərinin XVIII əsrə aid memarlıq nümunəsi olan Came məscidi vaxtilə həm ibadət, həm də təhsil məkanı kimi fəaliyyət göstərmişdir. Bu şəhərdə, həmçinin Cənubi Qafqazın ən böyük məscidlərindən biri olan görkəmli Heydər məscidi sizi qarşılayacaq. Eyni vaxtda 5 min nəfərin ibadət edə biləcəyi məscid 2023-cü ildə tam istifadəyə verilmişdir.
İstiqaməti Orubada çevirərək orada insana mənəvi dinclik verən məscidləri dolaşa bilərsiniz. Şəhərin mərkəzi meydanında ucaldılan Cümə məscidi xüsusi diqqətə layiqdir. XVII əsrdə I Şah Abbasın fərmanı ilə inşa edilən bu məscidin giriş qapısı üzərindəki kitabəyə görə, onun əsasının VIII əsrdə qoyulduğu ehtimal edilir. Şəhərin böyük və əsas məhəllələrindən biri olan Sərşəhər məhəlləsinin mərkəzində yerləşən eyniadlı Sərşəhər məscidi isə XVIII əsrə aid edilir və şəbəkə üsulu ilə hazırlanmış pəncərələri görənləri heyran qoyur.
Məscidlərlə yanaşı, Kəngərli rayonunun Qarabağlar kəndindəki Asnı piri və Culfa rayonunun Kırna kəndindəki Üç qardaş pirini ziyarət etməyə dəyər. Ehtimal olunur ki, Asnı pirinin tarixi qədim dövrlərə, yerli əhalinin hələ ağaclara, dağlara və suya sitayiş etdiyi vaxtlara gedib çıxır. Barəsində müxtəlif rəvayətlər gəzib-dolaşan digər pir isə xalq arasında “Deşik daş” və “Papaqlı daş” olaraq adlandırılır.
