Şəkidəaqroturizm təcrübəsi
“Bio Garden” ailə təsərrüfatı nəinki aqroturizm ilə maraqlananların, eləcə də təbiətin qoynunda dincəlmək istəyən hər kəsin sevimli məkanıdır. 2009-cu ildə müasir aqroturizmi inkişaf etdirmək ideyasından yola çıxan kompleks 2018-ci ildən bəri qonaqlarına xidmət göstərir. Bu təsərrüfatda qarşınıza çıxan Azərbaycanın digər bölgələrindən və dünyanın müxtəlif ölkələrindən gələn cürbəcür meyvə, tərəvəz və giləmeyvələr üzvi üsullarla becərilir. Hətta ziyarətçilər fermadan tam təbii, qatqısız meyvələrdən ala, həmçinin onları becərmə üsullarını öyrənə bilərlər. Təsərrüfatın ərazisi o qədər nəhəngdir ki, meyvə bağından tutmuş kiçik balıq fermasına və istirahət guşələrinə qədər hər şey var. Fermanın limon, kivi, qreypfrut, naringi və portağaldan ibarət geniş meyvə bağı bihuşedici ətri ilə adama uzaqdan gəl-gəl eləyir. Həqiqətən də hər qarışında yaşıllıq və dincliyin hökm sürdüyü bu məkandan insan ayrılmaq istəmir. Təsərrüfatda Niderland, Kanada və Avstraliyadan gətirilən dekorativ quşları da görə bilərsiniz ki, onlar fermaya xüsusi ab-hava qatır.
İlk dəfə gələn qonaqlar üçün fermer sahibi və ailə üzvləri kənd təsərrüfatını gəzdirir və maraqlı məlumatlar bölüşürlər. Yay mövsümündə təsərrüfat ərazisində ləzzətli yeməklər və çay dəstgahı təqdim edən restoran və kafe fəaliyyət göstərir. Digər mövsümlərdə gəlmək istəsəniz, öncədən rezervasiya etməyiniz tövsiyə olunur.
Ətraflı məlumat üçün:
- Ünvan: Öyrət kəndi, Şəki
- Tel.: +99450 264 99 90
- instagram.com/biogarden.az/
- facebook.com/biogarden.az/
Giriş: 5 AZN (yerli vətəndaşlar), 10 AZN (xarici turistlər)
