sənətkarlıq emalatxanalarıvə əl işləri
Qədimlərdə İpək Yolu üzərində əsas ticarət mərkəzlərindən biri olmuş Şəki bu gün də özünün tarixi əhəmiyyətini qoruyub saxlayır. Şəhərin dahi mütəfəkkir Mirzə Fətəli Axundzadənin adını daşıyan mərkəzi küçəsindəki kiçik suvenir dükanlarında isə yerli sənətkarlıq məhsulları ilə tanış olmaq mümkündür.
Şəkinin yerli sənətkarlıq nümunələri – istər Azərbaycan qadınlarının başlarına bağladıqları rəngbərəng baş örtükləri olan kəlağayılar, istərsə də qədim üslubda tikilmiş libaslar, təkəlduz üsulu ilə hazırlanmış, gül-çiçək təsvirləri ilə bəzədilmiş balış və mütəkkələr, şübhəsiz, görənlərin marağına səbəb olacaq.
Ziyarətçilər Şəkidə həm nəsildən-nəsilə ötürülən el sənətini bu gün də yaşadan bacarıqlı sənətkarlarla tanış ola, həm də onların əl işlərindən – dibçəklər, papaqlar, miniatür mücrülər, milli musiqi alətlərindən əldə edə bilərlər. Müxtəlif formalı və ölçülü xüsusi taxta parçaları arasına minlərlə rəngli xırda şüşə yerləşdirilmiş şəbəkələrin möhtəşəm mozaikasını görmək üçün isə Şəki qalasında şəbəkə emalatxanasını ziyarət edin.
