Şəki Xan Sarayındaekskursiya
Şəkinin mərkəzində, 500 illik çinar ağacının kölgəsində qərar tutmuş, gözəl naxışlar vurulmuş, milli ornamentlərlə bəzədilmiş Şəki Xan sarayı xanlıqlar dövrünə aid ən möhtəşəm memarlıq abidəsidir. Saray XVIII əsrin sonlarında Böyük Qafqaz dağlarının ətəklərində inzibati bina kimi inşa edilmişdir.
Yerli hökmdarlar tikinti işlərində ən xırda detallara xüsusi diqqət yetirirdilər: sarayın divarları daxildən və xaricdən zərif təsvirlərdən tutmuş həndəsi fiqurlu kirəmitlərə qədər mürəkkəb naxışlarla bəzədilmişdir. Sarayın şəbəkə üsulu ilə işlənmiş pəncərələri Şəkinin ən gözəl sənətkarlıq nümunələrindən biridir – şəbəkələr yapışqan və mismardan istifadə edilmədən minlərlə müxtəlif rəngli şüşə parçaları və taxtadan hazırlanmışdır.
Təcrübəli bələdçi ilə bu saraya yollanın və şəkili ustaların misilsiz əl işindən zövq alın.
