Şəki xanlarının mirasıXan məscidi
Tarixi mənbələrə görə, XVIII əsrə aid bu məscidi Məhəmmədhüseyn xan tikdirdiyi üçün xalq arasında “Xan məscidi” adlandırılır. Məscid çay daşı, bişmiş kərpic, əhəng, kirəmit, həmçinin palıd, fıstıq, qovaq ağaclarından istifadə edilməklə inşa olunub. Məscidin xarici tağlı qalereyası var. Minarə və minarədən daha yüksəyə ucalan əzəmətli çinar ağacları məscidə xüsusi gözəllik verir. Məscidin yanında yalnız Şəki xanları və xan nəslinin nümayəndələri dəfn olunduğu qəbiristanlıq var ki, buraya “Xan qəbiristanlığı” deyirlər. Qəbir daşları yüksək məharətli ustalar tərəfindən hazırlanmış və oyma naxışlarla bəzədilmişdir. Məscidin həyətində muzey də fəaliyyət göstərir. İki mərtəbədən ibarət muzeydə Şəki xanlığı dövrünə aid fərqli eksponatlar, müxtəlif mənbələrdən toplanan maddi-mədəniyyət nümunələri təqdim olunur. Muzeyi gəzdikcə hər bucağı sanki insanı Şəki xanlığı dövrünə aparır.
Kompleks 2022-ci ildə bərpa olunduqdan sonra həm turistlərin ziyarəti, həm də ibadət üçün ictimaiyyətə açılmışdır. Kompleks “Yuxarı Baş” Milli Tarix-Memarlıq Qoruğunun ərazisində, Yuxarı Karvansaraydan cəmi 3-4 dəqiqəlik piyada məsafədə yerləşir. Şəkiyə gələn turistlərə buranı ziyarət etmək xüsusilə tövsiyə edilir.
Ətraflı məlumat üçün:
- Ünvan: Şəki şəhəri, F.Xoyski 140
- Telefon: +994 24244 56 04
- Giriş sərbəstdir.
