şərab və mədəni irsŞəki Şərab Muzeyi
“Şəki Şərab” zavodu ziyarətçilərini Böyük Qafqaz dağlarının, Alazan vadisinin və gözoxşayan üzüm plantasiyalarının mənzərəsi ilə qarşılayır. Zavod ərazisində yerləşən Azərbaycanın ilk şərab muzeyi isə qonaqları şərabçılıq tarixinə qısa, lakin olduqca maraqlı səyahətə aparır. Muzeydə Azərbaycanın üzümçülük və şərabçılıq mədəniyyətinin tarixini, üzümlərin sıxılma metodologiyasını və şərabın saxlanma qaydalarını əks etdirən zəngin ekspozisiya təqdim olunur. 500-dən artıq eksponat arasında şərab şüşələri kolleksiyasını, şərab etiketlərini, unikal fotoşəkilləri, rəsm əsərlərini, arxeoloji qazıntılar nəticəsində tapılmış artefaktları, həmçinin qədim şərab qablarının surətlərini görə bilərsiniz. Müasir multimedia ekspozisiyasında Azərbaycanın XIX və XX əsrin əvvəllərinə aid unikal şərab etiket kolleksiyasını kəşf etmək və şərabdan ilhamlanan görkəmli Azərbaycan şairlərinin yaradıcılığı ilə tanış olmaq mümkündür.
Ekskursiya zamanı keçirilən dequstasiya turunda qonaqlar şərabların dadına baxmaqla yanaşı, onların yaranma tarixi və istehsal prosesi ilə də yaxından tanış olurlar. “Şəki Şərab” zavodu ölkəmizdə yeganə oynaq şərab istehsalçısı kimi ziyarətçilərə həm oynaq, həm də klassik şərablardan dadmaq imkanı təqdim edir. Tur proqramına şərab dequstasiyası ilə yanaşı, qəlyanaltı seti, muzeyin və istehsalat sahəsinin ziyarəti də daxildir.
Ətraflı məlumat üçün:
Ünvan: Şəki, Çələbixan qəsəbəsi
Tel.: +99455 203 76 22 (muzey); +99410 723 71 72 (mağaza)
