Məhsəti Gəncəvininyaradıcılıq irsi
Növbəti sətirlərdə bir qədər indiki zamandan ayrılıb XII əsrə - Məhsəti Gəncəvinin dövrünə gedəcəyik.
Gəncə şəhərində dünyaya göz açan və ömrünün sonuna kimi burada yaşayan Məhsəti Gəncəvi Azərbaycanın ilk görkəmli qadın şairəsi, şahmatçı və musiqiçisidir. Çoxşaxəli isteadı ilə insanı heyrətləndirən bu xanım tarixdə yaratdığı musiqili rübailəri və hətta müxtəlif musiqi alətlərində ifası ilə milyonların könlünü xoş etmişdir. Məhz onun zəngin yaradıcılıq irsini yaşatmaq üçün Gəncədə saraylara bənzər Məhsəti Gəncəvi Mərkəzi yaradılmışdır. Şərq və Qərb üslubunu öz memarlıq quruluşunda əks etdirən binada Məhsəti Gəncəvinin həyat və yaradıcılığı, ədəbi irsi haqqında kitablar, Azərbaycan, rus və ingilis dillərində elektron formatda rübailəri, eləcə də Azərbaycanın görkəmli şair və mütəfəkkirləri, Azərbaycan musiqisi və xalçaçılığa aid nəşrlər təqdim olunur.
Muzeydə Heydər Əliyev Fondunun təşkilatçılığı ilə Fransanın Reyms və Miluz şəhərlərində Məhsəti Gəncəvinin 900 illiyi münasibətilə keçirilmiş sərgi və konsertlərdən fotolara baxa bilərsiniz. Mərkəzin milli geyimlər sərgisi isə ziyarətçilər tərəfindən ən çox sevilən bölmədir. Burada sərgilənən geyimlər Məhsəti dövrü, xüsusilə də İntibah dönəminin xanımlarına xas zərifliyi və milliliyi əks etdirir.
Rəsm qalereyasında Məhsəti Gəncəviyə və onun rübailərinə həsr edilmiş müxtəlif tablolar, sənət nümunələri, monumental əsərlər nümayiş etdirilir. Məhsəti otağında şairənin heykəli ucaldılıb və proyektor vasitəsilə miniatür və rəsm əsərləri təqdim edilir. Bu otaq digərlərindən fərqli olaraq insanda unudulmaz təəssüratlar buraxır.
Ətraflı məlumat üçün:
- Ünvan: Əttarlar küçəsi, Cavad xan küçəsinin yaxınlığı
- İş qrafiki: Bazar ertəsi - şənbə, 10:00-18:00
- Giriş ödənişsizdir
