Gəncənintürbələr səltənəti
Gəncədə yaşı əsrlərə dayanan Səbzikar qəbiristanlığı həm də türbələrinin sayının çoxluğuna görə yerli əhali tərəfindən “türbələr səltənəti” adlandırılır. Çox qədimdən günümüzə qədər gəlib çıxan bu məzarlıqda şəhərin nüfuzlu şəxsləri, ictimai xadimlər və tanınmış nəsillərin nümayəndələri dəfn olunub. Ümumiyyətlə, bu qəbiristanlığa “Səbzikar” adının verilməsinin xüsusi bir tarixçəsi var. Qəbiristanlığın “Səbzikar” olaraq adlandırılması həmin vaxt bu ərazidə göy-göyərti becərilməsi ilə əlaqədardır. Burada əsrlərin yadigarı olan 17 türbə var və bu türbələr yerli əhəmiyyətli tarixi abidə səviyyəsindədir. Həmin türbələr və sərdabələr burada dəfn olunan şəxslərin, nəsillərin adları, soyadları ilə tanınır.
Türbələrin hamısı Gəncə memarlığına xas bişmiş qırmızı kərpicdən inşa edilib. Bütün türbələr üstləri günbəzlə tamamlansa da, pəncərə-divarlarının hörgüsündəki naxışları, eləcə də şiş uclu, yastı, yarımdairəvi və digər formalı günbəzləri ilə bir-birindən fərqlənirlər. Tarixçilərin araşdırmalarına görə, Səbzikarda İslamdan əvvəlki abidələrə yəni, nekropol tipli məzarlara rast gəlinir. Bu nekropollar qədim Roma, yunan-ellin mədəniyyəti ilə bağlıdır və daha çox çevrə formasındadır.
Səbzikar günü bu günədək Gəncənin tarixini özündə yaşadır. Şərq memarlığının elementlərini görmək üçün yolunuzu bu məkandan sala bilərsiniz.
Ətraflı məlumat:
- Giriş sərbəstdir.
- Ünvan: Gəncə şəhəri, Fətulla Həsənov 67
- Ziyarət saatları: 09:00-19:00
