Cavad xan küçəsindətarixin izləri
Gəncə şəhərinin mərkəzi və uzun küçələrindən biri olan bu küçə Gəncənin sonuncu xanı Cavad xanın şərəfinə bu cür adlandırılmışdır. Cavad xan küçəsi hazırda gəncəlilərin və xarici turistlərin ən çox gəzdiyi, gözəl zaman keçirdikləri məkanlardan biridir. Bu küçədə Gəncə memarlığına xas olan qırmızı kərpic ənənəsi əsrlərdir qorunub saxlanılır, hətta bərpa işləri aparılan binalarda qədim ornamentlər və naxışlar üzə çıxarılmışdır. Vaxtilə Azərbaycan Xalq Cümhuriyyəti qurucularından olan Xasməmmədov qardaşlarının yaşadığı ev, “Azərbaycan” qəzetinin ilk nömrəsinin dərc olunduğu tarixi mətbəənin binası, həmçinin alman irsi nümunələrindən olan "Zinger Co." tikiş maşınları fabrikinin satış anbarı da Cavad xan küçəsinin tarixi tikililərindəndir. Nizami Gəncəvi nəslinə mənsub Şeyxzamanovların yaşadığı ev də burada yerləşir. Küçə boyunca mağazalar, mehmanxanalar, kafe və restoranlar, ənənəvi çay evləri, xalçaçılıq və rəssamlıq dərnəkləri fəaliyyət göstərir. Ənənəvi üsulla hazırlanan çay və ləzzətli Gəncə paxlavasını bu küçədə yerləşən çay evlərində dada bilərsiniz.
Açıq səma altında muzeyi xatırladan Cavad xan küçəsini görünüşcə Bakının Fəvvarələr meydanına da bənzədirlər, lakin bu küçə bir qədər döngələri ilə fərqlənir.
