yay-qış bolsuluQurqur şəlaləsi
Özünəməxsus danışıq dili və mədəniyyətə malik Qrız kəndindən 2,8 km məsafədə yerləşən Qurqur şəlaləsi el arasında həm də Qrız şəlaləsi olaraq tanınır. Qrız-Qalaxudat haykinq marşrutunun üzərindəki şəlalə dəniz səviyyəsindən 2190 m hündürlükdədir, hündürlüyü isə 6 m-dir. Qurqur şəlaləsi Qızılqaya dağından başlayır, mənbəyini ondan bir qədər aralıda yerləşən Babbey şəlaləsi və Bərkdərədən götürür. Qışda qayalıqlar arasından süzülən şəlalə şaxtanın təsirindən donub buz bağladığı üçün möcüzəvi görüntü yaradır. Buzlar şəlaləni sehrli bir məkana çevirir, ona görə də qış vaxtı burada daha maraqlı, nağıllar aləminə bənzər bir atmosfer yaranır.
Kənddən şəlaləyə maşın yolu yoxdur. Kəndə gedən və hazırda istifadə olunan yol çox çətin və təhlükəli olduğundan yalnız UAZ tipli və ya yolsuzluq avtomobilləri ilə getmək mümkündür. Təhlükəsizlik baxımından peşəkar bələdçi və ya kənd sakinlərinə müraciət edə bilərsiniz. Yürüş təcrübəsi olanlar isə Qrız-Qalaxudat haykinq marşrutu boyunca istiqamətverici nişanları izləyərək Qurqur şəlaləsinə rahatlıqla gedib qayıda bilər. Şəlaləyə gedərkən təhlükəsizlik qaydalarına əməl etməyi unutmayın. Yaxşı yol!
