Qalaxudat – Xınalıq marşrutu üzrə haykinq

Asan yürüşləri sevənlər üçün bu marşrut əla seçimdir. Cığırlar hər yerdə aydın sezilir və tam işarələnib. Bu nişanları izləyərək kəndin içindən, məktəbin aşağısından düz keçərək aşırıma doğru 1 km-ə yaxın nisbətən yoxuş yolu qət edəcəksiniz. Bu aşırımdan Xınalıq ətrafındakı yüksək dağlara mənzərə açılır. Aşırımdan bir qədər enişdən sonra solda yol kənarında Bostankeş kəndini görəcəksiniz. Yürüş boyu müəyyən nöqtələrdə qarşınıza istiqamət nişanları çıxacaq. Aydın və geniş yolla çox az eniş-yoxuşlu 6 km məsafəni qət edib, Xınalıq kəndi görünən nöqtəyə çatırsınız. Buradan 800 m məsafəni enərək kiçik çayı keçib, sol tərəfdəki kəndə qalxırsınız. Yürüş kəndin girişindəki bulağın yanında yekunlaşır. Vaxtınız varsa, kəndin yuxarı hissəsində yerləşən məscidə baş çəkə bilərsiniz. Bu nöqtədən kəndin mərkəzinə enmək üçün az dağılmış asfalt yolu izləmək kifayətdir.

Ətraf cığırlar

Bu marşrutu Qrız-Qalaxudat marşrutu ilə birləşdirə bilərsiniz.

Mövsüm

Texniki olaraq asan yürüş olduğu üçün ilin bütün fəsillərində bu marşrutu gedə bilərsiniz. Yaşıl təbiətdən zövq almaq istəsəniz, may – iyul, qarlı dağları görmək üçün isə dekabr-fevral aylarında bu marşrut çox idealdır. Amma səfər öncəsi hava proqnozunu yoxlamaq tövsiyə olunur. Dumanlı, yağışlı və qarlı hava şəraiti yürüşü çətinləşdirə bilər.

May və sentyabr aylarında, qoyun sürülərinin köç vaxtı Qalaxudat aşırımından sonrakı açıq düzdə bəzən çoban itləri ilə qarşılaşa bilərsiniz. Buradan keçərkən ehtiyatlı olun. Yarana biləcək xoşagəlməz halların qarşısını almaq üçün çobanı uzaqdan səsləməyiniz tövsiyə olunur.

Qida və gecələmə

Qalaxudat və Xınalıq kəndlərində restoran və ya kafe yoxdur (yalnız Xınalıqda kiçik çay evi var). Ancaq kəndlərdə qonaqlara yemək və gecələmə təklif edən qonaq evləri fəaliyyət göstərir. Gecələmək üçün qonaq evləri, hotel və digər yerləşdirmə müəssisələrinin yerini marşrutun xəritəsində tapa bilərsiniz.

Su
Qalaxudat kəndində birbaşa marşrutun üzərində bulaq yoxdur, amma yerli sakinlərdən su istəyə bilərsiniz. Havanın istiliyindən asılı olaraq ən azı 1,5-2 litr su ehtiyatı götürməyiniz məsləhətdir. Yürüş boyu yağışlı günlərdə suyu bulanıq olan kiçik çayın üzərindən keçəcəksiniz. Yayda isə çayın suyunu içmək tövsiyə olunmur – çayın suyunu yuxarıda yerləşən alaçıqlarda çobanlar heyvandarlıqda istifadə edirlər.

Nəqliyyat

Qalaxudat kəndinə yolsuzluq avtomobili ilə getmək mümkündür və Qubanın mərkəzindən yalnız yerli taksilər ilə 50 AZN qarşılığında getmək olar. Yürüş edib Xınalıqdan həmin gün qayıdacağınız təqdirdə sizi gözləməsi və Qubanın mərkəzinə geri gətirməsi üçün əlavə 10 AZN ödəyəcəksiniz.

İcazələr və xüsusi mühafizə edilən ərazilər
Bu marşrutla hərəkət etmək üçün öncədən heç bir icazə almaq tələb olunmur. Cığır heç bir xüsusi mühafizə olunan təbiət ərazisindən və ya sərhəd mühafizə zolağından keçmir.