Xınalığın yun corablarıisti qonaqpərvərliyin simvolu
Dörd bir tərəfdən Qafqaz dağları ilə əhatə olunmuş və dünyanın hər yerindən bura üz tutan ziyarətçiləri öz sehrinə valeh edən Qubanın Xınalıq kəndi nəinki özünəməxsus dili və həyat tərzi ilə fərqlənir, həm də naxış motivləri ilə bəzənmiş toxuculuq və xalçaçılıq ənənələri ilə tanınır. Xınalıq əhalisi arasında geniş yayılmış sənətkarlıq növlərindən biri də elə məhz rəngli naxışlarla işlənmiş yun materialdan olan corabların toxunmasıdır. Əsasən heyvandarlıqla məşğul olan kənd sakinləri uzun müddət qışlaq və yaylaqlarda yaşadıqları üçün bol yun ehtiyatı toplamağa və onu səmərəli istifadə etməyə çalışırlar. Əldə etdikləri yun materialdan isə xalçalar, keçə materialı, isti corablar, xurcun, kilim və məfrəşlər toxuyurlar.
Adətən iki formada (qısa və uzunboğaz) olan Xınalıq corablarına həm qışlaq, həm də yaylaq həyatında xüsusi üstünlük verilir. Hər il Xınalıqdakı ailələrdə onlarla cüt corab toxunulması artıq uzun illərdir davam edən qədim adətlərdən biridir. Keçmişdə bu corablar yerli sakinlər tərəfindən digər kəndlərin əhalisi ilə mübadilə vasitəsi kimi də istifadə olunmuşdur.
Maraqlıdır ki, Xınalıq kəndində hər bir ailəyə aid corab çeşniləri (təsvirləri) var və bu naxışlar adətən nəsildən-nəslə ötürülür. Məhz buna görə hazır corabın naxışına baxaraq hansı ailədə toxunduğunu öyrənmək, şübhəsiz ki, asan olur. Yun materialından əldə edilən ip adətən təbii bitkilərdən istifadə edilməklə boyanır. Xınalıq corablarının naxış elementlərinə yerli xalçalarda da rast gəlmək olar ki, onlar da öz növbəsində bir-birindən fərqli simvollarla zəngindir.
Xınalığa yolunuz düşsə, al-əlvan saplardan toxunaraq xoş ovqat bəxş edən corablardan alıb özünüzə və sevdiklərinizə incə düşünülmüş hədiyyə edin.
