Qubada yerlimətbəx üzrə masterklaslar
Azərbaycanın şimal bölgəsində qərar tutan Quba və ətraf yerləri misilsiz təbiət abidələri ilə yanaşı, həm də son dərəcə ləziz şirniyyatları – bükmə və paxlavası ilə tanınır. Onları şəhərin bütün kiçik şirniyyat sexləri və evlərdə hazırlayırlar.
Qubada olarkən sözügedən ləzzətləri dequstasiya etməklə yanaşı, onların hazırlanması üzrə masterklaslara da qoşulmağı tövsiyə edirik. Desert və qəlyanaltı kimi məşhur olan Quba paxlavası içərisi üyüdülmüş qozla doldurulan, düyü unundan hazırlanan və “rişdə” adlandırılan çoxqatlı xəmirdən hazırlanır, üstünə şərbət və bal tökülür. Süfrəyə təqdim edilərkən üzərinə qoz ləpələri düzülür. Bükmənin hazırlanmasında da eyni ərzaqlardan istifadə edilir. Lakin bükmə öz forması və daha yüngül olması ilə fərqlənir.
Onların necə hazırlandığını görmək üçün şəhər mərkəzində turistlər üçün xüsusi masterklaslar təşkil edən yerli sexlərə baş çəkə bilərsiniz. Masterklaslar Quba Regional Turizm İdarəsi, yaxud xüsusi bələdçilər tərəfindən təşkil edilir.
