Qrız – Qrızdəhnə marşrutu üzrə haykinq

MƏSAFƏ: 8,5 KM

YOXUŞ: 470 M

ENİŞ: 1330 M

MAKS. HÜNDÜRLÜK: 2100 M

MİN. HÜNDÜRLÜK: 1330 M

MÜDDƏT: 3 SAAT 40 DƏQ

Yürüş kifayət qədər çətin hesab olunduğundan ehtiyatlı və təcrübəli olmağı tələb edir. Cığırlar hər yerdə aydın sezilir və tam işarələnib. Bu işarələri izləyərək kəndin çıxışından yerlilərin “Eh yolu” adlandırdığı cığırla təxminən 4,5 km irəliləyirsiniz. “Xan kek” deyilən yerdə cığır ikiyə ayrılır. Sola gedən, nişanlanmamış cığır Xoruz qayası və Qrızdəhnə şəlaləsinin yuxarısındakı kaskad şəlaləyə qədər uzanır. Daha irəli getmək təhlükəlidir və məsləhət deyil. Qrızdəhnə kəndinə gedən cığır isə sağa doğru kəskin döngələrlə enərək meşənin dərinliklərinə qədər davam edir. Meşə daxilində 1,5 km daha maneəsiz yürüşdən sonra Qrızdəhnə kəndində maşın yolu kənarına çatırsınız.

Mövsüm

Texniki olaraq çətin yürüş olduğu üçün uyğun dağ yürüş geyimlərinizin olması çox vacibdir. “Eh yolu” ilə meşəyə eniş sərt olduğuna görə yüksəklik qorxusu olanlar üçün bu marşrut uyğun deyil. Qışın qarlı vaxtlarında isə bu marşrut ümumiyyətlə təhlükəli ola biləcəyi üçün məsləhət görülmür. Yaşıl təbiətdən zövq almaq istəsəniz, may-iyul aylarında bu marşrut çox idealdır. Amma səfər öncəsi hava proqnozunu yoxlamaq tövsiyə olunur. Dumanlı, yağışlı və küləkli hava şəraiti yürüşü xeyli çətinləşdirə bilər.

Ətraf cığırlar

Bu marşrutu Qalaxudat-Qrız marşrutu ilə birləşdirə bilərsiniz.

Qida və gecələmə

Qrız kəndində restoran və ya kafe yoxdur. Ancaq yemək və gecələmə təklif edən qonaq evləri var. Qrızdəhnə kəndi isə turistik kənddir və istər mövsümi, istərsə də ilboyu fəaliyyət göstərən restoran və hotellər mövcuddur. Həmçinin qonaqlara yemək və gecələmə təklif edən qonaq evləri də var. Gecələmək üçün qonaq evləri, hotel və digər yerləşdirmə müəssisələri, eləcə də kafe və restoranların yerini marşrutun xəritəsində tapa bilərsiniz.

Su

Kənddən çıxmamış kəndlilərin həyətlərində bulaqlardan su qablarınızı doldura bilərsiniz. Havanın istiliyindən asılı olaraq ən azı 1,5-2 l su ehtiyatı götürməyiniz məsləhətdir. Marşrut boyunca yalnız bir yerdə içməli bulaq suyu var. Maşın yolundan “Eh yolu”na döndükdən bir qədər sonra bulaq qarşısınıza çıxacaq.

Nəqliyyat

Qrız kəndinə yolsuzluq avtomobili ilə getmək mümkündür, həmçinin Qubanın mərkəzindən yerli taksilər ilə 60 AZN qarşılığında getmək olar. Həmin gün Qrızdan geri qayıdacaqsınızsa, yaxud Qrızdəhnə kəndinə yürüş edəcəyiniz təqdirdə yürüşün sonunda Qrızdəhnədən Qubaya eyni sürücüyə əlavə ödəniş etmədən geri qayıda bilərsiniz.

İcazələr və xüsusi mühafizə edilən ərazilər

Bu marşrutla hərəkət etmək üçün öncədən heç bir icazə almaq tələb edilmir. Cığır heç bir xüsusi mühafizə olunan təbiət ərazisindən və ya sərhəd mühafizə zolağından keçmir.