quşlara məskənQızılağac Milli Parkı
Xəzər dənizi sahilində yerləşən Qızılağac Milli Parkının sahəsi təxminən 100 000 hektara yaxındır. Qızılağac Xəzər dənizinin qərb sahilləri boyunca köç edən quşların istirahət etmək, eləcə də yenidən uzunməsafəli yola çıxmaq üçün doyunca qidalanmaq məqsədilə dayandığı yerlərdən biridir. Milli Parkın unikal landşaftı, dayaz su hövzələri, qamışlıqları və bataqlıqları əsasən oktyabr – may aylarında milyonlarla quşun məskəninə çevrilir. İl boyu burada fərqli quşlara rast gəlmək olar.
Quş müşahidəçiləri burada bataqlıq quşları – qarabatdaqkimilər, qutanlar, ərsindimdiklər, qazlar (nadir ağqaş qaz da daxil olmaqla), vağlar, su quşları, ördəklər kimi çox sayda quş növlərini izləyə bilərlər.
Qızılağac qoruğu 1976-cı ildə “Su-bataqlıq yerləri Konvensiyası”nın suətrafı və suda üzən quşların məskunlaşması üzrə beynəlxalq əhəmiyyətli qoruq sırasına daxil edilib.
Ərazinin ən yaxşı quş müşahidə nöqtələri Milli Parkdan bir qədər aralıda – cənuba, laqun tərəfdən yarımadaya tərəf gedən yolun üstündədir. Ərazidə mövcud flora və fauna ilə yaxından tanış olmaq üçün öncədən müəyyən hazırlıqların görülməsi lazımdır və tur bələdçisinin müşayiəti ilə əlaqəli Turizm İnformasiya Mərkəzinə müraciət etmək olar.
Əraziyə xas quşlar
Yazda və payızda:
Sarıbaş çaydaçapan (Motacilla citreola)
Lil cüllütü (Calidris falscinellus)
Boz səsyamsılıyan (Xenus cinereus)
Çöl belibağlısı (Circus macrorus)
Çöl qartalı (Aquila nipalensis)
Ərsindimdik (Platalea leucorodia)
Qaranaz ibis (Plegadis falcinellus)
Dəyirmidimdik üzərçə (Phalaropus lobatus)
Kürənquyruq alaçöhrə (Lanius isabellinus)
Turac (Francolinus francolinus)
Yaşıl qızlarquşu (Merops persicus)
Ağbığ silvi (Curruca mystacea)
Fitçi cürə (Anas crecca)
Qışda:
Kiçik qarabatdaq (Microcarbo pygmeus)
Qıvrımlələk qutan (Pelecanus crispus)
Güləyən qağayı (Ichthyaetus ichthyaetus)
Ağqaş qaz (Anser erythropus)
Göydimdik ördək (Oxyura leucocephala)
Adi flaminqo (Phoenicopterus roseus)
Qırmızıdöş qaz (Branta ruficollis)
Adi bəzgək (Tetrax tetrax)
Ağquyruq dəniz qartalı (Haliaeetus albicilla)
Sərçəçalan qızılquş (Falco columbarius)
Çay ilbizcüllütü (Tringa stagnatlis)
Böyük oxcüllüt (Limosa limosa)
Qaraboyun batağan (Podiceps nigricollis)
Ən uyğun dövrlər
Quşlar sayca qış mövsümündə çox olsa da, yaz və payızda daha çox növdə quşları müşahidə etmək olar. Oktyabrdan maya qədər olan dövr daha uyğundur. Noyabr-mart aylarında çox sayda vəhşi quşları, həmçinin Mərkəzi Asiyadan qışlamaq üçün gələn nadir quş növlərini müşahidə etmək mümkündür. İyul-avqust aylarında havanın isti olması ilı laqunlarda minlərlə quş görmək olar
Gecələmə
Masallı şəhərində yerləşən komfortlu “Masallı hotel” (+994709513086) əsas yoldan dənizə tərəf döndükdə, quş müşahidəsi üçün uyğun ərazilərdən cəmi 3 km məsafədə yerləşir. Hotelin restoranı da var. “Mandarin hotel” (+994505478383) isə Lənkəran yolunun üstündə, Liman qəsəbəsindən 9 km, Qızılağac Milli Parkından isə 27 km məsafədə yerləşir. “Khan Lankaran Hotel” (+994508101056) Milli Parkdan 28 km məsafədədir. Hotelin restoranında milli mətbəxin nümunələrini dadmaq olar. Lənkəran şəhərində daha çox hotel fəaliyyət göstərir.
