Masallınınşəfalı vannaları
Masallı-Yardımlı yolunun üzərində, Viləşçayın yaxınlığında yerləşən Yanardağ adlanan ərazi möcüzəli ab-havası ilə insanı öz sehrinə salır. Ərazinin bu cür adlandırılması burada yüzillər boyu alovlanan bulaq və dağın olmasından irəli gəlir. Bu suyun tərkibində kükürd olduğuna görə alov dəyən kimi o, yanmağa başlayır. Belə ki, əraziyə daxil olduqda yerdən birbaşa çıxan kükürd tərkibli isti suyun dumanı sizi qarşılayır. 200 pillə qalxdıqdan sonra yanan daşlar və birbaşa yerdən çıxan alovu təbiətin bir möcüzəsi kimi dəyərləndirmək olar. Hazırda bu ərazidə eyni adda “Yanardağ” İstirahət Mərkəzi fəaliyyət göstərir ki, burada termal vannalardan istifadə edə bilərsiniz. Burada insanlar ayaq ağrılarından, həmçinin bir çox başqa xəstəliklərdən qurtulmaq üçün bulaqdan istifadə edirlər. Yanar bulaqdan axan su müalicəvi sayılır.
Həmçinin Masallıda sağlamlıq və müalicə imkanları baxımından Masallı İstisu Sağlamlıq Mərkəzinə də üz tuta bilərsiniz. Mərkəz daxilində qonaqların rahat seçimi üçün iki müxtəlif sanatoriya fəaliyyət göstərir. Bu yer Masallıda ən böyük və qədim isti su sanatoriyasıdır. Digər isti su mənbəyi olan məkanlardan fərqli olaraq, burada xırda ölçüdə olan isti su vannaları ilə yanaşı, açıq hava altında olan böyük isti su hovuzu da var. Ərazidə, həmçinin müalicə qəbul etmək üçün müayinə-müalicə məntəqələri və həkim personalı da qonaqların ixtiyarındadır. Müxtəlif masaj və fizioterapiya prosedurlarıdan da yararlana bilərsiniz.
Ətraflı məlumat üçün:
“Yanardağ” İstirahət Mərkəzi
- Giriş: 5 AZN
- Tel.: +99470 335 22 22; +99451 494 74 04
- İş qrafiki: May-sentyabr aylarında hər gün, 09:00-18:00
Masallı İstisu Sağlamlıq Mərkəzi
- Giriş: 5 AZN (masaj 10-25 AZN)
- Tel.: +99455 926 73 75; +99450 311 39 22; +99450 411 88 99
- İş qrafiki: May-oktyabr aylarında hər gün, 10:00-18:00
