Naxçıvan mətbəxinin təamlarınıdadın
Əsrlərdən bəri formalaşan Naxçıvan mətbəxi nəsildən-nəsilə ötürülən zəngin kulinariya ənənələri və ləzzətli təamları ilə seçilir. Bu dadlı, ətirli təamlar tam təzə və təbii məhsullardan ərsəyə gəlir. Hətta yerli əhalinin qida rasionunda quzu əti xüsusi yer tutur. Həmçinin Naxçıvanın münbit torpaqlarında yetişən meyvə-tərəvəzlər isə yeməklərə başqa bir ləzzət qatır.
Regionun ən maraqlı yeməklərindən biri, şübhəsiz, arzuman küftəsidir. Yalnız Naxçıvanda dada biləcəyiniz bu unikal yemək elə ilk baxışdan heyrətinizə səbəb olacaq. Azərbaycan mətbəxinin incilərindən olan bu yemək adi küftələrdən çəki və ölçüsünün böyüklüyü ilə fərqlənir və bir neçə nəfər üçün nəzərdə tutulub. Bütöv şəkildə bişirilmiş toyuğun içinə qaynadılmış yumurta qoyulduqdan sonra çəkilmiş mal əti və yağlı qoyun əti ilə bürünərək iri küftə halına gətirilir. Süfrəyə isə qaynadılmış kartof ilə təqdim edilir.
Bu bölgənin digər bir sevilən yeməyi qovurma şorbasıdır. Bu yemək əsasən yerin altında saxlanılan saxsı qabda qovurma edilmiş qoyun ətindən hazırlanır və paxla, kartof və paşot yumurta ilə servis edilir.
Ordubad da ballı qayğanağı, alana çərəz növü, həmçinin məhsuldar əncir, ərik, şaftalı və armud bağları ilə tanınır. Azərbaycanın ən ləzzətli limonları burada yetişir. Bütün bu meyvələr daha sonra qış üçün qurudulur və Naxçıvanın izdihamlı yerli bazarlarında satılır. Bu bazarlara mütləq baş çəkməyiniz tövsiyə olunur.
