Kuzun – Yerği kek marşrutu üzrə haykinq

Marşrut boyunca işarələr aydın sezilir və onları izləyərək irəliləyin. Bu yol yay aylarında Sudur kəndinə getmək üçün, qışda isə kuzunlular tərəfindən ot tayalarını daşımaq üçün istifadə olunur. 500 m-dən sonra sol yol Ləzə kəndinə gedir. Siz isə düz davam edib, 200 m-dən sonra yolayrıcında sola dönürsünüz. 4 km bu yoxuşlu yolla davam edib solda kəndə ayrılan cığırla davam edəcəksiniz. 3 km məsafə qət edib Şahdağ platosunun sərt sıldırım qayalarıqlarına açılan mənzərə ilə rastlaşacaqsınız. Kənd isə buradan bir az aşağıdadır. 

Mövsüm
Texniki olaraq çətin yürüş olduğu üçün uyğun dağ yürüş geyimlərinin olması və yürüş təcrübəsi vacibdir. Xüsusən qışda qarlı vaxtlarda bu marşrutu qış yürüş geyimləri olmadan getmək tövsiyə olunmur. Yaşıl təbiətdən zövq almaq istəsəniz, may – iyul aylarında bu marşrut çox idealdır. Amma səfər öncəsi hava proqnozunu yoxlamaq tövsiyə olunur. Dumanlı və yağışlı hava şəraiti yürüşü çətinləşdirə bilər. 
Yürüşün 6-cı km-də may – sentyabr aylarında qoyun sürülərinin yanında çoban itləri ilə qarşılaşa bilərsiniz. Buradan keçərkən ehtiyatlı olun. Yarana biləcək xoşagəlməz halların qarşısını almaq üçün çobanı uzaqdan səsləməyiniz tövsiyə olunur.

Ətraf cığırlar
Bu marşrutu Laza – Kuzun marşrutu ilə birləşdirmək olar.

Qidalanma və yerləşdirmə
Yerği kek ucqar kənd olduğu üçün turistik yer deyil. Kənddə qonaq qəbul edən yalnız bir ev var. Dükan, kafe və ya restoran yoxdur. Gecələmək üçün qonaq evləri, hotel və digər yerləşdirmə müəssisələrinin yerini marşrutun xəritəsində tapa bilərsiniz.

Su 
Kənddən çıxmamış kəndlilərin həyətlərində bulaqlardan su qablarınızı doldura bilərsiniz. Kəndin içində su doldura biləcəyiniz bulaq yoxdur. Havanın istiliyindən asılı olaraq ən azı 1,5-2 litr su ehtiyatı götürməyiniz məsləhətdir. Marşrut boyunca yalnız bir yerdə içməli bulaq suyu var. Bu su mənbəyi yürüşün təxminən 2,5 km məsafəsində kiçik kolların, ağacların yaxınlığından axır.

Nəqliyyat
Qusarın mərkəzindən Kuzuna yalnız yerli taksilər ilə 25-30 AZN ödəniş qarşılığında getmək olar. Həmin gün Kuzundan geri qayıdacaqsınızsa, sürücü sizi gözləyə və əlavə ödəniş tələb etmədən Qusara geri qaytara bilər.

İcazələr və xüsusi mühafizə edilən ərazilər 
Bu marşrutla hərəkət etmək üçün öncədən heç bir icazə almaq tələb edilmir. Cığır heç bir xüsusi mühafizə olunan təbiət ərazisindən və ya sərhəd mühafizə zolağından keçmir.