Yerği kek – Kuzun marşrutu üzrə haykinq

Marşrut boyunca işarələr aydın sezilir və onları izləyərək irəliləyin. Aşırımı aşdıqdan sonra bir qədər düz gedib dolama enişə çatdıqda, sağda dərənin sonunda Kuzun kəndi və kəndə gedən yol görünəcək. Cığır isə Arçan-Kuzun yoluna qədər daha 2 km davam edəcək. Yola çıxıb sağa – kəndə qədər düz davam edirsiniz. 3,5 km-dən sonra sağa ayrılan cığır Qusarçay kanyonu ilə Laza kəndinə gedir. Əsas yol ilə çayı keçib kəndə daxil olursunuz. 

Mövsüm
Texniki olaraq çətin yürüş olduğu üçün uyğun dağ yürüş geyimlərinin olması və yürüş təcrübəsi vacibdir. Xüsusən qışda qarlı vaxtlarda bu marşrutu qış yürüş geyimləri olmadan getmək tövsiyə olunmur. Yaşıl təbiətdən zövq almaq istəsəniz, may – iyul aylarında bu marşrut çox idealdır. Amma səfər öncəsi hava proqnozunu yoxlamaq tövsiyə olunur. Dumanlı və yağışlı hava şəraiti yürüşü çətinləşdirə bilər. 
Yürüşün 2-ci km-də may – sentyabr aylarında qoyun sürülərinin yanında çoban itləri ilə qarşılaşa bilərsiniz. Buradan keçərkən ehtiyatlı olun. Yarana biləcək xoşagəlməz halların qarşısını almaq üçün çobanı uzaqdan səsləməyiniz tövsiyə olunur. 

Ətraf cığırlar
Bu marşrutu Kuzun – Laza marşrutu ilə birləşdirə bilərsiniz. 

Qida və gecələmə
Yerği kek ucqar kənd olduğu üçün turistik yer deyil. Kənddə qonaq qəbul edən yalnız bir ev var. Dükan, kafe və ya restoran yoxdur. Gecələmək üçün qonaq evinin yerini marşrutun xəritəsində tapa bilərsiniz.

Su 
Kənddən çıxmamış kəndlilərin həyətlərində bulaqlardan su qablarınızı doldura bilərsiniz. Havanın istiliyindən asılı olaraq 1,5-2 litr su ehtiyatı götürməyiniz məsləhətdir. Marşrut boyunca yalnız iki yerdə içməli bulaq suyu var. Kuzun istiqamətində yürüşə başlayan kimi solda dərədə ilk bulağı görəcəksiniz. Digər bulaq isə 6 km-dən sonra kiçik kolların, ağacların yaxınlığından axır.

Nəqliyyat
Yerği kek və Sudur kəndlərini Qusar şəhəri ilə birləşdirən yolun uzunluğu 60 km-dən çoxdur. Qusarın mərkəzindən Yerği kekə bu yol ilə yerli taksilər ən azı 100 AZN qarşılığında aparırlar. Nəzərə alın ki, yolun son 10 km-ni yalnız yolsuzluq avtomobili ilə getmək mümkündür. Digər yol isə Kuzun – Arçan – Yerği kek yoludur. Bu yol ilə Qusar şəhərindən yerli taksilər ilə 70-80 AZN-ə getmək mümkündür. Nəzərə alın ki, yolun Kuzun kəndindən sonrakı hissəsi yalnız yolsuzluq avtomobili üçün yararlıdır. Bundan başqa, bu yol yalnız yaz və yay aylarında tam fəaliyyət göstərir, qışda isə yağıntıların miqdarı səbəbindən Yerği kek kəndinə çatmaq çox vaxt mümkün olmur.

İcazələr və xüsusi mühafizə edilən ərazilər 
Bu marşrutla hərəkət etmək üçün öncədən heç bir icazə almaq tələb edilmir. Cığır heç bir xüsusi mühafizə olunan təbiət ərazisindən və ya sərhəd mühafizə zolağından keçmir.