zamanın dayandığıCıdır düzü
Cıdır düzü Şuşanın cənubunda, Qarqar çayı dərəsinin yuxarı hissəsində yerləşir. Ərazisinin böyüklüyünə və hamarlığına görə ən qədim dövrlərdən burada Qarabağ igidlərinin cıdır yarışları, çövkən oyunları, Novruz və digər el şənlikləri keçirilmişdir.
Bundan əlavə, Cıdır düzü ədəbi-musiqi məclislərinin, musiqi şənliklərinin keçirildiyi yer olmuşdur. Belə ki, kim Qarabağa gəlsə, Cıdır düzünü ziyarət etmədən getməzdi. Yeri gəlmişkən, uzun illərdən sonra 2021-ci ildə Cıdır düzündə yenidən “Xarıbülbül” musiqi festivalı təşkil edilmişdir. Şuşanın azadlıq rəmzi, qələbə simvoluna çevrilən Xarıbülbül – elmi adı ilə Qafqaz qaş səhləbi (lat. Ophrys Caucasica) Cıdır düzündə bitən endemik güldür.
Cıdır düzündən 200 metr aşağıda dərə boyunca axan Qarqar çaya və insanın gözləri önündə ucalan əzəmətli Kiçik Qafqaz dağlarına açılan mənzərə insanı ovsunlayır. Cıdır düzünü ancaq görmək onun dillər əzbəri olan gözəlliyi haqqında tam təsəvvür yarada bilər.
