Qarabağın döyünən ürəyibənzərsiz Şuşa
Qarabağın incisi, Azərbaycanın ən gözəl guşələrindən biri olan Şuşaya təbiət təkrarsız gözəlliyə malik mənzərələr, bulaqlar bəxş etmişdir. Əbəs yerə belə hesab edilmir ki, Şuşaya bu ad şüşə kimi təmiz, şəffaf və möhtəşəm havasına görə verilmişdir.
2023-cü ildə Şuşa “Türk dünyasının mədəniyyət paytaxtı” elan edilib. Çünki bu şəhər uzun əsrlər boyu Azərbaycan mədəniyyətinin, musiqisinin, ədəbiyyatının mərkəzi olub. Bu şəhər dünyaya Üzeyir Hacıbəyov, Molla Pənah Vaqif kimi məşhur bəstəkar və şairləri bəxş edib. Azərbaycanın ilk şairələrindən biri, ölkə ədəbi irsinin görkəmli nümayəndəsi Xurşidbanu Natəvan da Şuşanın mədəni həyatında mühüm rol oynamışdır. 1873-cü ildə şəhərə çəkilən ilk su kəmərinin “Xan qızı” adlandırılması da məhz şairənin adı ilə bağlıdır.
Bundan əlavə, Şuşa Qarabağ xanlığının banisi olan Pənahəli xanın vaxtilə yetişdirməyə başladığı Qarabağ atları ilə də tanınır. Məşhur rus rəssamı Vasili Vereşşaqin hətta xatirələrində belə yazırdı: “Həyatım boyu gördüyüm ən gözəl atlar Şuşadadır”. Yeri gəlmişkən, bu gün bu cins dünyanın ən qiymətli cinslərindən biri hesab olunur.
Daha bir diqqətəlayiq fakt isə ondan ibarətdir ki, Şuşa Xarıbülbülün vətəni hesab olunur. Bu endemik gülün valehedici gözəlliyi və mənəvi dəyəri haqqında çoxlu əfsanə və hekayələr var. Orxideya ailəsindən olan bu unikal gül öz formasına görə bülbülə bənzəyir və onun adı da buradan gəlir: Azərbaycan dilindən tərcümədə “xar” sözü tikan mənasını verir, yəni “tikan üstündə oturub oxuyan bülbül” deməkdir.
Beləliklə, Şuşa zəngin tarixi, mədəni irsi və nadir təbiət abidələrini özündə birləşdirir. Bu şəhər əsrlər boyu özünəməxsusluğunu və əhəmiyyətini qoruyub saxlamaqla dünyanın hər yerindən tarix və mədəniyyətsevərlərin diqqətini cəlb etməkdə davam edir.
