Laçın və kəndləriturizmin incisi
Laçın rayonu geniş meşə sahələri, yasaqlıq əraziləri, zəngin flora və faunası ilə bölgənin ekosisteminin cəlbediciliyini artırır. Burada yerləşən alban məbədləri, məscidlər və digər mədəni abidələr rayonun qədim tarixi irsini nümayiş etdirir. Rayonun kəndləri özünəməxsus təbiəti, coğrafi mövqeyi və mədəni xüsusiyyətləri ilə Laçının turizm dəyərinin formalaşmasında mühüm rol oynayır.
Zabux kəndi Həkəri və Zabux çaylarının qovuşduğu mənzərəli, dağlıq ərazidə yerləşir. Təmiz hava, hüzur və yürüş imkanlarının vəhdəti bu ərazini təbiət sevərlər üçün ideal istirahət məkanına çevirir. Yay aylarında yerli sakinlər evlərini qonaq evləri kimi turistlərə təqdim etməklə onların yerli həyat tərzi ilə daha yaxından tanış olmasına şərait yaradırlar.
Hüsülü kəndi də dağlıq ərazidə yerləşir və təbii landşaftları ilə diqqət çəkir. Burada trekking, kampinq və dağ kəndində kənd həyatını təcrübə etmək mümkündür. Həmzə Sultan sarayı bölgənin zəngin tarixi irsini yaşadan mühüm abidələrdən biridir.
Mirik kəndində mağaralara, şəlalələrə, unikal qaya formalarına və vulkanik süxurlar nəticəsində yaranmış landşaftlara daha çox rast gəlinir. Burada yerləşən qədim mağaralar “Qaranlıq kaha” və “Bayqara” kimi abidələr regionun qədim tarixindən xəbər verir. Konusvari qayalar, qaya göbələkləri və tək dayanan sütunlar kimi unikal geoloji formalar əraziyə xüsusi görünüş qazandırır. Ağbulaq, Pəri bulağı və Çiçək bulağı kimi təbii su mənbələri isə həm gözəllik, həm də sağlamlıq turizmi baxımından böyük əhəmiyyət daşıyır.
Unikal coğrafi mövqeyi və füsunkar təbiəti ilə Sus kəndi dağ turizmi üçün cəlbedici məkanlardan biri hesab olunur. Çay vadiləri boyunca uzanan yaşıl mənzərələr və vulkanik yaylanın yaratdığı geoloji xüsusiyyətlər bu kəndə xüsusi təbii görünüş qazandırır.
Bəylik kəndi isə göz oxşayan təbiəti, sakit mühiti və əlçatan mövqeyi ilə seçilən turizm məkanlarındandır. Bu kənd turistlərə həm aktiv, həm də rahat istirahət imkanları təqdim edir. Burada dağ yürüşləri, təbiət gəzintiləri, kampinq üçün xüsusi şərait mövcuddur.
