gözəllik səltənətiŞuşa təbiəti
Suyu yayda buz kimi sərin, qışda isə nisbətən ilıq olan İsa bulağı Şuşanın özü qədər məşhurdur. Meşələr ilə əhatə olunan bu səfalı guşə haqqında hətta belə bir deyim də var ki, “İsa bulağında olmayan Şuşada olmayıb”. Bir çox tarixi hadisələrin şahidi olan bu bulaq Şuşa azad edildikdən sonra Şuşa Şəhəri Dövlət Qoruğu İdarəsi tərəfindən tam bərpa edilib. Büllur sulu bulağın gözyaşı kimi dumduru, insana fiziki və ruhi güc verən suyundan içmədən Şuşadan ayrılmaq olmaz.
Çətirə oxşayan formasına görə bəzən Çətir şəlaləsi də adlanan Şır-şır şəlaləsi Daşaltı dərəsində yerləşir. Mənbəyini Şuşanın dağlarından götürən bu şəlalənin suyu axaraq Daşaltı çayına qovuşur. Ətrafda göz işlədikcə uzanan, nağıllar aləmini xatırladan mənzərə, dağlardan süzülüb gələn suyun şırıltısı insanın ruhuna dinclik verir.
Şuşa təbiətinin nadir sərvətlərindən biri də Topxana meşəsidir. Ərazisi Şuşa rayonu ətrafındakı torpaqların 20%-ni əhatə edən bu meşədə vaxtilə yaşı bilinməyən palıd, qarağac, fıstıq ağacları, xalıya bənzəyən çəmənlər, zümzüməli bulaqlar var idi, məhz ona görə də bura təbiətin möcüzəsi hesab olunurdu. 2021-ci ildə Topxana meşəsinin bərpasına başlanılıb, ərazidə palıd, vələs, dağdağan ağacları əkilib. İndi bu meşəyə yeni nəfəs gəlir.
Qarqarçay kanyonu ekoturizm potensialı çox olan Şuşanın vizual gözəllik mənbələrindəndir. Kanyon cənub-qərbdən şimal-şərq istiqamətində Qarabağ yaylasını kəsən, Şuşa şəhəri rayonunda üst yura əhəngdaşları massivinə dərin nüfuz edən eyniadlı çayın orta axınında yerləşir və onun uzunluğu 5 kilometrdən çoxdur. Kanyona yürüyüş zamanı ilham verən şəlalələri, “yaşıl ciyər” adlanan meşələri, daş dövründən qalan mağaraları, əsrləri birləşdirən daş körpüləri görmək mümkündür.
