şimal-qərb bölgəsindədad dünyasına səyahət
Qax, Zaqatala və Balakən rayonlarını əhatə edən Azərbaycanın şimal-qərb bölgəsinin ucqar kəndləri fındıq, şabalıd, xurma dolu yamyaşıl bağlar ilə zəngindir. Bu bağlar mövsümdə elə bol məhsul verir ki, bunun şərəfinə festivallar keçirilir. Hər il payız fəslində Zaqatalada fındıq, Balakəndə isə xurma festivalı təşkil olunur.
Qaxın dağ kəndlərinin mətbəxi isə qaxac, yəni qurudulmuş əti ilə tanınır. Qoyun ətindən və barmaqla xüsusi forma verilən xəmirdən hazırlanan sürhüllü əsas yerli təam kimi xüsusilə məşhurdur və daha çox soyuq aylarda nuş edilir. Bu yeməyi dadmaq üçün ən gözəl məkan rayonun ucqar kəndi Sarıbaşdır.
Şimal-qərb bölgəsinin zəngin mətbəxinə, həmçinin qızılgülün ləçəyindən hazırlanan mürəbbələr, gülab suyu, eləcə də Böyük Qafqaz dağlarının ətəklərinin gül-çiçəyindən çəkilən təbii bal daxildir.
