mənzərələri ilə ovsunlayanQəbizdərə kəndi
Heç bilirdinizmi Zaqatalada belə gözəl bir kənd var?
Bura Böyük Qafqaz dağlarının ətəyində, Katex çayının sağ sahilində qərar tutan Qəbizdərə kəndidir. Zaqatala şəhərindən 8 km aralıda yerləşən kənddə ümumilikdə 50 ev var və burada yaşayan əhalinin 98%-i avarlardır. Kəndin özü çox qədimdir, belə ki XIX əsrə aid məscid, qədimi bürc və XVIII-XIX əsrlərə aid edilən qədim abidə əsas tarixi məkanlardandır. Həmçinin kənddə Katexçay və Kilsəçay çayların birləşməsi nəticəsində yaranan Qəbizdərə və ya başqa adla Katex şəlaləsi yerləşir. Bu şəlalə ölkənin ən bol sulu şəlalərindən biridir. Lakin hazırda təhlükəsizlik səbəbilə şəlaləyə qalxmağa icazə verilmir.
Qəbizdərə çox tarixi və ənənələri olan bir kənddir. Hər il yerlilərin ənənəvi olaraq qeyd etdiyi bayram var ki, onu “Hədik bayramı”, bəzən də“ Mövlüd ayı” deyə adlandırırlar. Hədik bayramı yazın gəlişi zamanı, torpaq və bitkilər oyanan zaman əsasən mart-aprel aylarında qeyd edilir. Adəti üzrə kənd sakinləri kimin həyətində hədik bişirilibsə, oraya dəvətsiz gedir və bayramlaşaraq birlikdə hədik yeyirlər. Kənd həm də sürhüllü, maxara, girs, ispiri (gilas ilə hazırlanan turşu), ağartı məhsulu olan məqəş (el dilində şor), hər həyətdə olan təndir və kürələri ilə tanınır. Təbiət qoynunda yerləşən məşhur restoranlarda həm dincələ, həm də bu ləzzətli yeməklərdən nuş edə bilərsiniz. Qədim Qəbizdərədə gecələmək istəsəniz, öz evlərini qonaq evi kimi kirayə verən sakinlərə çəkinmədən müraciət edə bilərsiniz.
