“qızılgüllər diyarı”Zaqatala
Zaqatalaya qızılgül kolları ötən əsrin 60-cı illərində Bolqarıstandan gətirilib. Həmin dövrdən başlayaraq rayonda qızılgülün “Raduqa”, “Krım”, “Mürəbbə qızılgülü” və s. növləri yetişdirilməkdədir. Yerli sakinlər küçələri, həyətləri bəzəyən bu güllərin gözəlliyindən və ətrindən zövq almaqla kifayətlənməmiş, onlardan qızılgül mürəbbəsi, gül suyu, gülab, şərbətlər hazırlanmasında məharət qazanmışlar.
Yolunuz Zaqatalanın Aşağı Tala kəndində yerləşən “Lecheq Farm and Distillery” gül yağı emalı zavoduna məxsus qızılgül və lavanda plantasiyalarına düşsə, özünüzü bir anlıq əsl cənnətdə hiss edəcəksiniz. 2016-cı ildən etibarən fəaliyyət göstərən “Lecheq Farm and Distillery” təsərrüfatında Dəməşq qızılgülü, ensizyarpaq lavanda və nanə kimi bitkilər yetişdirilir. Kölgəsi olmayan gül sahələrini ziyarət etmək istəsəniz, qızmar günəşdən qorunmaq üçün sahəyə səhər saatlarında baş çəkməyiniz tövsiyə olunur. Sahəyə səfəriniz zamanıdörd bir yanınızı bürüyən gözəlliyi seyr etdikcə güllərin bihuşedici qoxusu sizi valeh edəcək. Bu güllərin əhatəsində şəkillər çəkdirərək dostlarınızın diqqətini cəlb edə bilərsiniz.
“Lecheq Farm and Distillery” zavodunun qızılgül sahələrinə turlar may ayının əvvəllərindən təşkil olunur.Lavanda sahələrinin ilk ziyarətçilərindən olmaq üçün ən münasib vaxt iyunun ortalarından iyul ayının əvvəlinədək günün erkən saatları və ya gün batımı hesab olunur.
Plantasiyaların yaxınlığında yerləşən gül yağı emalı zavodunda olarkən gül yağı istehsalının dəyər zənciriboyunca bütün mərhələrini müşahidə edə biləcəksiniz. “Lecheq Farm and Distillery” zavodu və plantasiyalarına öncədən sifariş edəcəyiniz xüsusi turlar zamanı zavoddan simvolik həcmdə gül yağı da almaq imkanınız olacaq.
