|
MƏSAFƏ: 15,6 KM
YOXUŞ: 1350 M
ENİŞ: 1000 M
|
MAKS. HÜNDÜRLÜK: 1850 M
MİN. HÜNDÜRLÜK: 550 M
MÜDDƏT: 7 SAAT 55 DƏQ
|
Başlanğıc nöqtəsindən təqribən 3,5 km meşə yolu ilə qalxdıqdan sonra yaylağa qalxan cığır yoldan sola ayrılır. Aydın dolayı cığır 2 km irəlidə açıqlığa çıxır, 600 m irəlidə düşərgə yerinin yanından keçərək Honzoqor yaylağına çatır.
Car kəndinə düşən cığır yaylağın qərb qurtaracağından başlayır. Dağlara doğru uzanan sirtın sol yamacı boyunca az meyilli yoxuşla davam edən cığır 2 km irəlidə iki təpənin arasındakı düz sahəyə çıxır və sirtın sağ tərəfinə keçərək aşağıya doğru enməyə başlayır. İki tərəfdən meşəli dərələrlə əhatələnmiş sirt boyunca enən dolama cığır təqribən 4 km irəlidə sol tərəfə – meşəyə, daha 2 km irəlidə isə kəndin yuxarısındakı kiçik çay dərəsinə düşür. Çay kənarı boyunca uzanan cığır qarşı tərəflə kəsişərək kəndə çatır. Bu çayı keçdikdən sonra işarələri izləyərək kəndin mərkəzinə doğru yol alacaqsınız. Car kəndindən başlayan marşrutla haykinq etmək fiziki cəhətdən az yorucu hesab olunur.
Ətraf cığırlar
Ətraf ərazilər Zaqatala Dövlət Qoruğu və sərhəd mühafizə zolağı olduğu üçün işarələnməmiş marşrutlarla hərəkət etmək olmaz.
Mövsüm
Hava şəraiti və günün uzunluğu baxımından may – sentyabr ayları haykinq üçün ən münasib vaxt hesab olunur. Marşrut boyunca Honzoqor yaylağında kompakt şəkildə 20-30 çoban təsərrüfatı olur. Çoban itləri təhlükəlidirlər, lakin ətrafda insanlar çox olduğundan gündüz saatlarında insanlara hücum etmirlər. Çobanların may və sentyabr aylarında dağda məskunlaşmaqları haqda yerli camaatdan məlumat almaq olar. İtlərlə ehtiyatla davransanız, bu çoban alaçıqları isti sığınacağa çevrilə bilər və orada çobanlarla həmsöhbət ola bilərsiniz. Çadırınız yoxdursa, çobanların sığınacaqlarında (adətən boş sığınacaq olur) gecələməkdə mümkündür. Digər mövsümlərdə boş sığınacaq tapmaq daha asandır
Ümumilikdə, bu marşrut il boyu haykinq etmək üçün nəzərdə tutulsa da, qış aylarında xüsusi hazırlıq tələb edir. Qış, yaz və payız aylarında hava proqnozunu diqqətə almağınız, qida, geyim, ləvazimat (çadır, yataq kisəsi və s.) hazırlığı görməyiniz məqsədəuyğundur. Bu marşrutu soyuq və qısa qış günlərində bir günə bitirmək çətin və riskli olduğundan müvafiq çadır hazırlığı görmədən yola çıxmağınız məsləhət görülmür.
Qidalanma və gecələmə
Hər iki kəndin ərazisində kiçik dükanlar, kafe və restoranlar fəaliyyət göstərir.
Su ehtiyatı
Cığır boyunca ən azı üç məntəqədə su mənbəyi var. Yaylağa qalxana qədər adambaşı 1-2 litr su götürmək kifayətdir. Yaylaq və yol boyundakı bulaqlar su ehtiyatınızı artırmağa imkan verəcək.
Nəqliyyat
Zaqatala şəhərindən Qəbizdərə kəndinə mikroavtobusla (gediş haqqı – 0,60 AZN) və yaxud taksi ilə (gediş haqqı - 4-6 AZN) getmək mümkündür. Şəhər mərkəzindən Qəbizdərə kəndinin başlanğıcına (“Şəlalə” restoranı) kimi gediş haqqı 4 AZN, kəndin başına (“Qədim Qəbizdərə” restoranına) kimi isə 6 AZN təşkil edəcəkdir.
İcazələr və xüsusi mühafizə edilən ərazilər
Bu marşrutla hərəkət etmək üçün hər hansı bir dövlət qurumundan öncədən icazə almaq tələb olunmur. Marşrut xüsusi mühafizə olunan təbiət ərazilərindən, eləcə də sərhəd mühafizə zolağından keçmir və cığır boyunca heç bir yerdə daimi sərhəd postu yoxdur. Sərhədçilərlə qarşılaşdıqda sənədləri göstərib, hərəkət marşrutunu izah etmək kifayət edəcək.
