Qaxın gözəllikləriməşhur filmin kadrlarında
“Qorxma, mən səninləyəm!" filminin bəzi kadrları Bakıda çəkilsə də, çəkilişlərin böyük hissəsi Qax rayonunda baş tutub. 1981-ci ildə Yuli Qusmanın rejissorluğu ilə lentə alınan filmdə keşmiş SSRİ məkanında tanınmış aktyorlar – Muxtarbəy Kantemirov və Lev Durov, Azərbaycan kinosunun parlaq nümayəndələri – Həsənağa Turabov, Nəsibə Zeynalova, Mirzə Babayev, Həmidə Ömərova kimi tanınmış sənətkarlar rol alıb. Filmin bəstəkarı Polad Bülbüloğlu isə həm də baş rollardan birinin ifaçısıdır. Elə Polad Bülbüloğlunun filmin məşhur epizodlarından birində başında dayanaraq mahnı oxuduğu qala Qaxın tarixi məkanlarından olan Sumuq qalasıdır.
Filmin qəhrəmanı Rüstəm uzun illərdən sonra doğma kəndinə qayıdır və bütün hadisələr də bundan sonra baş verir. Filmdə cərəyan edən maraqlı hadisələrin fonunda İlisu kəndinin təbiət gözəlliklərinə elə ekran arxasından heyran olursan. Kadrlarda rastlaşdığımız Sumuq qalası, Ulu körpü kimi abidələr bu gün də öz möhtəşəmliyini qoruyur, yaşıl təbiətin qoynu isə yay aylarında turistlərin ən çox üz tutduqları yerlərdəndir.
“Qorxma, mən səninləyəm!” filminin izi ilə ölkəmizin şimal-qərb bölgəsinə yollanmaqla Qax şəhəri, İlisu və Ləkit kəndləri ilə tanış ola, Kürmükçay dərəsinin heyrətamiz mənzərələrinin canlı şahidi ola bilərsiniz. Yaxınlıqda yerləşən Mamırlı şəlaləsi və İlisu bulağı da səyahət marşrutuna daxildir.
