Qaşqaçay – Qumux marşrutu üzrə haykinq

Başlanğıc nöqtəsindən işarələri izləyərək kəndin içi ilə düz yol boyunca gedin. 100 m irəlilədikdən sonra həmin yol sağa dönərək evlərin arası ilə davam edir, 500 m-dən sonra isə meşəyə doğru yol başlayır. Geniş, aydın görünən yol 1,5 km-dən sonra aşırıma çatır və açıqlığa çıxır. Bu hissədə yol bir qədər sola tərəf aşağı enir vəkol basmış köhnə meşə yolu ilə meşənin içinə doğru uzanır. Kəndə yaxınlaşdıqca yol daha da aydınlanır və genişlənir. 2 km irəlidə yol meşədən açıqlığa çıxaraq kəndə yaxınlaşır. Nişanları izləyərək 1,3 km məsafədən sonra Qumux kəndinin əsas yoluna çıxa bilərsiniz.   

Ətraf cığırlar

Turun müddətini uzatmaq üçün bu marşrutu əvvəlcə İlisu – Qaşqaçay marşrutu ilə, Qumuxa çatdıqdan sonra isə maşınla (və ya piyada) 7 km yol gedib Baş Göynük – Kiş marşrutu ilə birləşdirmək tövsiyə olunur.    

Kişdən “Marxal Resort & Spa” istirahət mərkəzinə keçib oradan təklif edilən yolsuzluq maşınları ilə Xan yaylağına çıxa bilərsiniz. Həmin yolu piyada getməyə icazə verilmir. Xan yaylağına piyada çıxmaq istədikdə xəritədə bir qədər araşdırma aparıb, peyk görüntlərindən Şəki şəhəri ətrafından yaylağa qalxan cığırları rahatlıqla seçmək olar. Bu marşrutlar hələlik işarələnməyib və təcrübəsiz haykinq həvəskarları üçün tövsiyə olunmur. Şəki şəhərindən Orta Vərəzət kəndinə, oradan isə Baş Kəldək kəndinə meşəiçi, asan cığırlarla qısa yürüşlər etmək olar. Əksər turistlərin diqqətindən yayınan Vərəzət və Baş Kəldək kəndlərindəki qədim alban kilsələri elə yolunuzun üstündə rastınıza çıxacaq.

 

Mövsüm
May – sentyabr ayları hava şəraiti və günün uzunluğu baxımından ən uyğun vaxtlar hesab olunsa da, il boyunca bu marşrut üzrə rahatlıqla hərəkət etmək olar. Yağıntılı günlərdən sonra cığırlar palçıqlı olur.  Cığırüzərində adətən çoban alaçıqları olmur. 

Qida və gecələmə

Hər iki kənddə kiçik dükanlar və kafelər fəaliyyət göstərir. Gecələmək üçün qonaq evlərinin, hotel və digər yerləşdirmə müəssisələrinin, eləcə də kafe və restoranların yerini xəritədə tapa bilərsiniz.

Su ehtiyatı
Marşrut xətti üzərində su mənbəyi olmasa da, qısa və rahat olduğu üçün su ehiyatına görə narahat olmağa dəyməz. Yürüşdən kənarda çox vaxt keçirmədikdə 1 l su ehtiyatı kifayət edir. 

Nəqliyyat
Şəkidən Qaşqaçay kəndinə taksi ilə (*0066 və ya *5577 taksi xidməti) 12-15 AZN, Qaxdan şəhər taksiləri ilə (“ALO taksi xidməti”: +99470 298 99 66) isə 6-8 AZN-ə getmək mümkündür. Qax avtovağzalından Qaşqaçay kəndinə avtobusla gün ərzində 3 dəfə yola düşə bilərsiniz (07:30; 13:00; 18:00 (0,70 AZN)).

İcazələr və xüsusi mühafizə edilən ərazilər
Bu marşrutla hərəkət etmək üçün hər hansı bir dövlət qurumundan öncədən heç bir icazə almaq tələb olunmur.Marşrut xüsusi mühafizə olunan təbiət ərazilərindən, eləcə də sərhəd mühafizə zolaqlarından keçmir və cığır boyunca heç bir yerdə daimi sərhəd mühafizə postu yoxdur.