yüzilliklərin memarlığıİçəribazar
Qax rayonu saysız təbiət və tarixi mədəniyyət abidələri ilə zəngin olsa da, onlar içərisində xüsusi maraq doğuranı “İçəribazar” kompleksidir. Tarixi XVI əsrlərə gedib çıxan qalanın içərisində vaxtilə yaşayış binaları, müxtəlif sənət emalatxanaları, dükanlar və bazar olub. Buna görə də yerli əhali qala ilə əhatə olunan daxili ərazini indi də “İçəribazar” adlandırır. Qalanın giriş və çıxış qapılarında isə milli memarlıq ənənələrinin yaşadıldığını görmək mümkündür. Qaladan içəri girdikdə küçə boyunca nəfis şəkildə təbii daşlarda işlənilən qala divarları xoş atmosfer yaradır. Kompleksin ərazisində açıq səma altında nəhəng bir teatr yaradılıb ki, yaz-yay aylarında bu səhnədə konsertlər və əyləncəli proqramlar təşkil olunur.
Həmçinin burada tətbiqi sənət, ağacoyma və toxuculuq emalatxanaları və görkəmli bəstəkar Müslüm Maqomayevin babasının dəmirçi emalatxanası fəaliyyət göstərir. Tətbiqi sənət nümunələrinin satış mərkəzində yerli sənətkarların hazırladıqları milli suvenirlər, ağac üzərində oyma, daş üzərində təsvirlər, toxuculuq məmulatları, suvenir xalçalar ilə tanış ola və ala bilərsiniz.
Bu gün kompleksi ziyarət edən qonaqlar rayonun və bu qədim qalanın, yerli sakinlərin yaşam tərzi, adət-ənənələri və mətbəxi ilə maraqlanır və gözəl vaxt keçirirlər.
