Qaşqaçay – İlisu marşrutu üzrə haykinq

Başlanğıc nöqtəsindən işarələri izləyərək kəndin içi ilə davam edək. 400 m irəlidə çay yatağına çıxıb, qarşı tərəfə keçdikdən sonra böyük bir cığır başlayır. 1,3 km irəlidə cığır meşəyə tərəf yönəlir və 3,5 km sonra meşə zolağının üstünə – yaylaqlara çıxır. Burada ilk çoban alaçığı rastınıza çıxacaq. 

Sağa – dağlara doğru qalxan azyoxuşlu köndələn cığır ilə sol yamac boyu 4,5 km hərəkət edərək, növbəti çoban alaçığına çatıb, bir az irəlidə sola – meşəyə tərəf düşürsünüz. Bir qədər sonra yenidən açıqlığa çıxan cığır 1,5 km irəlidə növbəti çoban alaçığının yanından keçərək, dik dolayı yoxuşla davam edir və 800 m irəlidə aşırıma – marşrutun ən yüksək nöqtəsinə (Yarpızbasan yaylağına) çatır. Burada çardaqlı kiçik çoban alaçığı var. 

Qarşı tərəfdəki dərəyə düşən dolayı dik yol 1 km irəlidə sola dönərək, yamac boyu az meyilli enişlə köndələn davam edir. 2 km irəlidə isə seyrək meşəliklər arasından keçərək yenidən dik dolayı enişə doğru uzanır və 1 km irəlidə Şamil qalasına (19-cu əsr) çatır. Qaladan sağa dönən enli cığır 600 m irəlidə İlisu kəndinin mərkəzi küçəsinə çıxır.  

Bu marşruta İlisu kəndindən başlamaq fiziki cəhətdən daha rahatdır. 

Ətraf cığırlar
Qaşqaçay yürüşünə başlamazdan öncə Qumux – Qaşqaçay, Kiş – Baş Göynük marşrutlarını planınızaəlavə edə bilərsiniz. İlisu kəndindən sonrakı dağlıq ərazilər İlisu Dövlət Təbiət Qoruğunun ərazisinə və sərhəd nəzarət zolağına düşür. Yerli bələdçiniz olarsa və ya dəqiq işlənmiş xəritəniz və təcrübəniz varsa, İlisudan Qum və ya Ləkit Kötüklü kəndinə qədər 2 günlük trekkinq planlaya bilərsiniz. Bu istiqaməti ancaq yayda getmək məsləhətdir, çadır hazırlığı görmək tövsiyə olunur.  
 

Mövsüm
May – sentyabr ayları hava şəraiti və günün uzunluğu baxımından ən uyğun vaxtlar hesab olunur. Qeyd edilmiş aylarda bu marşrut boyunca 4-5 yerdə çoban alaçığı rastınıza çıxa bilər. May və sentyabr aylarında çobanların dağda olub-olmadığını yerli camaatla dəqiqləşdirə bilərsiniz. İtlərlə ehtiyatlı davrandıqda bu çoban alaçıqları sizin üçün isti sığınacaq və ya “məlumat mərkəzi” ola bilər. 

Ümumilikdə, bu marşrut il boyu haykinq etmək üçün nəzərdə tutulsa da, qış aylarında xüsusi hazırlıq tələb edir. Qış, yaz və payız aylarında hava proqnozunu diqqətə almağınız, qida, geyim, ləvazimat (çadır, yataq kisəsi və s.) hazırlığı görməyiniz məqsədəuyğundur. Bu marşrutu soyuq və qısa qış günlərində bir günə bitirmək çətin və riskli olduğundan müvafiq çadır hazırlığı görmədən yola çıxmağınız məsləhət görülmür. 

Qida və gecələmə
İlisu kəndində, eləcə də Qaxdan İlisuya gedən yol boyunca kiçik dükanlar, kafe və restoranlar fəaliyyət göstərir. Gecələmək üçün qonaq evlərinin, hotel və digər yerləşdirmə müəssisələrinin, eləcə də kafe və restoranların yerini xəritədə tapa bilərsiniz.

Su ehtiyyatı
Bu marşrutda bulaqlar məhdud saydadır. Cığırın yaxınlığında yalnız iki yerdə azsulu bulaq vardır. Yola düşərkən ən azından adambaşı 1,5 l su götürüb, qənaətlə istifadə etmək, eləcə də hər füsətdə su qablarınıdoldurmaq lazımdır. Çoban alaçıqlarından su istəmək və ya yaxınlıqdakı bulaqların yerini soruşmaq da olar.
 

Nəqliyyat
Şəki şəhərindən Qaşqaçay kəndinə taksi ilə (*0066 və ya *5577 taksi xidməti) gediş haqqı 12-15 AZN, Qax şəhərindən isə şəhər taksiləri ilə (“ALO taksi xidməti” +99470 298 99 66) 6-8 AZN təşkil edir. Qax avtovağzalından Qaşqaçay kəndinə avtobusla gün ərzində 3 dəfə yola düşmək olar. (07:30; 13:00; 18:00 (0,70 AZN))

İcazələr və xüsusi mühafizə edilən ərazilər
Bu marşrutla hərəkət etmək üçün hər hansı bir dövlət qurumundan öncədən icazə almaq tələb olunmur. Marşrut xüsusi mühafizə olunan təbiət ərazilərindən, eləcə də sərhəd mühafizə zolağından keçmir və cığır boyunca heç bir yerdə daimi sərhəd mühafizə postu yoxdur. Sərhədçilərlə qarşılaşdıqda sənədləri göstərib, hərəkət marşrutunu izah etmək kifayət edəcək.