Çıraqlı-Cavadxan zirvəsi marşrutu

Marşrut Gəncəçay dərəsinin sağ tərəfində yerləşən Çıraqlı kəndinin aşağı hissəsindən başlayır. Kəndin bir mərkəz yolu var. Bu yol ilə yuxarı doğru irəliləyib maşın yolu ilə davam etmək lazımdır. Marşrutun əsas hissəsi torpaq maşın yoludur, bir hissəsi isə dağ cığırlarıdır. Cığırlar hər yerdə aydın sezilir və tam işarələnib. Bu işarələri izləyərək irəliləyin. Kəndin yuxarı çıxışından 1,5 km sonra yolayrıcından düz davam etmək lazımdır. 3,1 km sonra yoxuş bitir və bu yoxuşun sonunda qəbiristanlıqdan sola dönmək lazımdır, 1 km-ə yaxın irəlilədikdən sonra sol tərəfə təpənin üzərinə doğru cığır ilə irəliləmək lazımdır.

Qarşıda görünən təpənin üzərindən aşıb sola doğru davam edəcəksiniz. Buradan ətrafa gözəl mənzərə açılır. Təpənin üzərinə qalxmadan sol tərəf ilə də irəliləmək mümkündür. Sola doğru 1,7 km cığırla getdikdən sonra qarşıdakı dağın sağ tərəfi ilə cığırla irəliləyirsiniz, 1,6 km sonra torpaq maşın yoluna çıxırsınız.

Maşın yolu ilə irəlilədikdə sola yol ayrılır – buradan düz davam etmək lazımdır. Bu yolayrıcından 2,5 km sonra məlumat lövhəsinə çatacaqsınız. Məlumat lövhəsinin yanında yolayrıcı var.

Sol yol ilə 700 m yuxarı qalxdıqdan sonra Cavadxan zirvəsinə çatırsınız. Sağ yol Hacıkənd qəsəbə yoluna qədər davam edir. Məlumat lövhəsinə çatdıqdan sonra Cavadxan zirvəsinə 700 metrlik yol var. Zirvənin hündürlüyü 2 107 metrdir.

Marşrutun ilk 5,3 km-i və son 4,1 km-i torpaq maşın yoludur, ortada qalan hissə isə dağ cığırlarıdır. Başlanğıcdan sona qədər əsasən yoxuş və nisbətən düz yoldur.

Çıraqlı kəndi Daşkəsən rayonuna aid olsa da, bu rayondan kəndə maşın yolu yoxdur, yalnız Göygöl rayonundan getmək mümkündür.

Marşrutu əks istiqamətdə də gedə bilərsiniz.
 

Ətraf cığırlar

Bu marşrut  Çıraqlı – Əzgilli və  Çıraqlı – Dəstəfur marşrutları ilə əlaqələndirilə bilər.

Mövsüm

Bütün mövsümlərdə gedilə bilər.

Qida və gecələmə

Kəndlərin heç birində mağaza yoxdur. Odur ki, marşruta başlamamışdan öncə tədarükünüzü görməlisiniz. Çıraqlı kəndində “Rasim’s Guest House” qonaq evində qalmaq olar (tel.: +99455 286 5228).

Su

Çıraqlı kəndində və marşrut boyunca beş yerdə bulaq var. Yekun nöqtədəki məlumat lövhəsindən sağ istiqamətdə 1 km sonra bulaq var. 
 

Nəqliyyat

Çıraqlı kəndinə Daşkəsən rayonundan maşın yolu yoxdur. Kəndə Daşkəsən rayonunun Kollu və Dəstəfur kəndlərindən piyada gedə bilərsiniz. Kollu kəndindən 4,1 km, Dəstəfur kəndindən isə 8,5 km məsafədədir. Əzgilli kəndindən maşınla getməl olar.

Əzgilli kəndi Göygöl rayonunun Daşkəsən rayonu ilə sərhəd sonuncu kəndidir. Bu kəndə tək maşın yolu Toğana kəndindəndir.

Göygöl avtovağzalından Toğana kəndinə avtobus və ya taksi ilə gedə bilərsiniz. Toğana kəndindən Əzgilli kəndinə getmək üçün dağ maşını lazımdır. Müəyyən ödəniş müqabilində Göygöl Milli Parkının girişindən qeyd edilən məkana sizi yolsuzluq avtomobilində apara bilərlər. Danışıq əsasında eyni avtomobillə geri qayıtmaq üçün sürücüdən gözləməyi xahiş etmək olar.
 

Təhlükə qeydi

Qəbiristanlıqdan sonra bir neçə yerdə may ayından oktyabr ayının sonunadək çoban alaçıqları olur. Bu ərazidə çoban itlərindən ehtiyatlı olmaq lazımdır. Pis hava şəraiti, azmaq təhlükəsi və s. kömək lazım ola biləcək hallarda çoban alaçıqlarına müraciət edə bilərsiniz.