Cavadxan zirvəsi – Çıraqlı marşrutu üzrə haykinq

Marşrutun əsas hissəsi torpaq maşın yoludur, bir hissəsi isə dağ cığırlarıdır. Cığırlar hər yerdə aydın sezilir və tam işarələnib. Bu işarələri izləyərək irəliləyin. Sol yol ilə irəliləmək lazımdır. Bir qədər sonra maşın yolu bitir və bu yerdə yol iki yerə ayrılır. Buradan sağ yol ilə davam etmək lazımdır.

Maşın yolu bitdikdən sonra 1,6 km irəliləyib, qarşıdakı təpənin sağ tərəfindən keçib sola doğru irəliləmək lazımdır. 1,2 km sonra qarşıdakı təpənin üstündən keçmək lazımdır. Bu hündürlükdən ətraf ərazilərə gözəl mənzərə açılır. Təpənin sağ tərəfi ilə də keçmək mümkündür. 1,7 km sonra maşın yoluna çıxırsınız. Buradan sağa dönmək lazımdır. Yolun üzərində köhnə qəbiristanlıqla rastlaşacaqsınız, həmin hissədə yolayrıcından sağa dönmək lazımdır. Qəbiristanlıqdan 2,4 km sonra sola yolayrıcı var. Buradan düz davam etmək lazımdır.

Qəbiristanlığa qədər olan hissədə cığır əsasən ağacsız, çılpaq ərazi ilə davam edir, sonrakı hissə isə seyrək meşəlik ərazidir. Başlanğıcdan sona qədər əsasən eniş və nisbətən düz yoldur, bir neçə yerdə kiçik yoxuşlar var. Marşrutun yekun nöqtəsi Çıraqlı kəndidir. Çıraqlı kəndi Daşkəsən rayonuna aid olsa da, bu rayondan kəndə maşın yolu yoxdur, yalnız Göygöl rayonundan getmək mümkündür.

Marşrutu əks istiqamətdə də gedə bilərsiniz.

Ətraf cığırlar

Bu marşrut Cavadxan zirvəsi – Əzgilli, Çıraqlı – Dəstəfur marşrutları ilə əlaqələndirilə bilər.

Mövsüm

Bütün mövsümlərdə gedilə bilər.

Qida və gecələmə

Yol boyu və Çıraqlı kəndində mağaza yoxdur. Odur ki, marşruta başlamamışdan öncə tədarükünüzü görməlisiniz. Çıraqlı kəndində “Rasimin qonaq evi"ndə qalmaq olar (tel.: +99455 286 5228).

Su

Məlumat lövhəsinə 1 km qalmış bulaq var. Marşrut üzərində beş yerdə və Çıraqlı kəndində bulaq var.

Nəqliyyat

Göygöl avtovağzalından Toğana kəndinə gedən avtobus və ya taksilərə minə bilərsiniz. Hacıkənd qəsəbəsindən Toğana kəndi istiqamətində hərəkət etdikdə “5 ulduz” restoranına çatmamış sağ tərəfə dönmək lazımdır. Torpaq maşın yolu ilə 10 km irəlilədikdən sonra məlumat lövhəsinə çatacaqsınız. Həmin torpaq maşın yolu yolsuzluq avtomobillərinin hərəkəti üçün uyğundur. Əgər həmin hissəni piyada getməyəcəksinizsə, Göygöl avtovağzalından yolsuzluq avtomobili ilə yola çıxın, çünki yolayrıcında maşın tapmaq çətin ola bilər.

Çıraqlı kəndindən sonra maşın yolu yoxdur. Maşınla və ya piyada Əzgilli kəndinə qayıda, yaxud Dəstəfur kəndinə qədər yenidən piyada gedə bilərsiniz.

Təhlükə qeydi

Marşrut üzərində bir neçə yerdə may ayından oktyabr ayının sonunadək çoban alaçıqları olur. Bu ərazidə çoban itlərindən ehtiyatlı olmaq lazımdır. Pis hava şəraiti, azmaq təhlükəsi və s. kömək lazım ola biləcək hallarda çoban alaçıqlarına müraciət edə bilərsiniz.