Çıraqlı – Dəstəfur marşrutu üzrə haykinq

Cığırlar hər yerdə aydın sezilir və tam işarələnib. Bu işarələri izləyərək irəliləyin. Marşruta başladıqdan 1,8 km sonra Gəncə çayının sahilinə çatırsınız. Gəncə çayının sahili ilə 350 m axın istiqamətində irəlilədikdən sonra çayın digər sahilində çardaq və bulaq olan yerdən çayı keçmək lazımdır. Burada meşənin içi ilə davam edən köhnə maşın yolu ilə rastlaşacaqsınız. Meşənin içindən açıqlığa çıxdığınız yerdə yol iki hissəyə ayrılır. Sol yol ilə 250 m sonra Kollu kəndinə, sağ yol ilə 4,6 km sonra Dəstəfur kəndinə çatırsınız. Marşrut bütünlükdə köhnə maşın yolu ilə irəliləyir. Bu yol hazırda yararsız vəziyyətdədir və maşınların hərəkəti üçün uyğun deyil.

Marşrutu əks istiqamətdə də gedə bilərsiniz.
 

Ətraf cığırlar
Bu marşrut Çıraqlı – Əzgilli və Çıraqlı – Cavadxan zirvəsi marşrutları ilə əlaqələndirilə bilər.

Mövsüm
İlin yağıntı çox düşən və soyuq vaxtlarında Gəncə çayını keçmək çətin ola bilər. 

Qida və gecələmə
Marşrut üzərində yalnız Dəstəfur kəndində bir kiçik dükan var. Odur ki, marşruta başlamamışdan öncə tədarükünüzü görməlisiniz. Çıraqlı kəndində “Rasimin qonaq evi”ndə (+99455 286 5228), Dəstəfur kəndində isə “Səmayənin qonaq evi”ndə (+99455 225 7871) qalmaq olar.

Su
Kəndlərdə olan bulaqlardan başqa, marşrut üzərində yalnız bir yerdə bulaq var – Gəncə çayını keçdiyiniz yerdə sol sahildə. 

Nəqliyyat
Çıraqlı kəndinə Daşkəsən rayonundan maşın yolu yoxdur. Çıraqlıya Göygöl rayonunun Əzgilli kəndindən maşınla gedə bilərsiniz. Yol yalnız dağ maşınları üçün uyğundur.

Əzgilli kəndi Göygöl rayonunun Daşkəsən rayonu ilə sərhəd sonuncu kəndidir. Bu kəndə tək maşın yolu Toğana kəndindəndir.

Göygöl avtovağzalından Toğana kəndinə avtobus və ya taksi ilə gedə bilərsiniz. Toğana kəndindən Əzgilli kəndinə getmək üçün dağ maşını lazımdır. Müəyyən ödəniş müqabilində Göygöl Milli Parkının girişindən qeyd edilən məkana sizi yolsuzluq avtomobilində apara bilərlər. Danışıq əsasında eyni avtomobillə geri qayıtmaq üçün sürücüdən gözləməyi xahiş etmək olar.

Çıraqlı kəndi Əzgilli kəndindən 9,3 km məsafədədir.

Təhlükə qeydi

Gəncə çayını keçmək üçün körpü yoxdur. Çay kifayət qədər enlidir, bu səbəbdən üzərindən hoppanmaq mümkün deyil və çayın içi ilə keçmək lazımdır. İlin yağıntılı vaxtlarında çayın səviyyəsi qalxır, həmin vaxtlarda çayı keçmək məsləhət görülmür.