Meysəri
Azərbaycanın ən yeni şərab zavodlarından biri olan “Şirvan şərabları” (“Meysəri” olaraq da tanınır) ölkədə Avropa Birliyinin sertifikatını almış ilk orqanik şərab istehsalçısıdır. Zavodun üzüm bağlarının ilk 40 hektarı 2014-cü ildə salınıb və buradan 2015-ci ildə məhsul yığılıb. Bu gün həmin ərazi 160 hektar sahəni əhatə edir və yeni emal bölməsində Pera-Pellenc tərəfindən hazırlanmış yüksək keyfiyyətli fransız avadanlıqlarından istifadə olunur. Burada şərab turlarına daxil edilmiş kiçik şərabçılıq muzeyi, restoran və mehmanxana fəaliyyət göstərir. Milli mətbəximizin ən nəcib elementlərini özündə əks etdirən Abqora restoranında ləziz təamlar orqanik Meysəri şərabları ilə birgə təqdim olunur və qonaqlar üçün xüsusi masterklaslar təşkil edilir.
Şamaxı yaxınlığında yerləşən “Meysəri” şərab zavodunu Bakıdan İsmayıllı, Qəbələ, Şəki, yaxud Ağsu istiqamətində hərəkət etdikdə asanlıqla tapa bilərsiniz. Hələlik turlarda qonaqların yalnız fransız üzüm sortlarından alınmış təbii şərab variantlarının dequstasiyası nəzərdə tutulur. Bununla belə, gələcəkdə turistlərin dadması üçün təqdim olunan şərab növləri artırılacaq.
